Фото: Reuters

Исроилнинг умумий хавфсизлик хизмати (Шин Бет) вакиллари Исроил ва Фаластиннинг ҲАМАС ҳаракати ўртасидаги можаро авж олишидан олдин, Бош вазир Бинямин Нетаньяхуни бир неча ой давомида унинг ички сиёсати сабаб бўлган сиёсий беқарорлик мамлакатдаги вазиятни заифлаштираётгани ҳақида огоҳлантирган. Аммо ҳукумат раҳбари исроиллик генералларнинг баёнотларини эътиборсиз қолдирган. Бу ҳақда “The New York Times” хабар бермоқда.

Нашрнинг таъкидлашича, Яқин Шарқдаги энг қудратли ҳарбий куч нафақат ҳужум кўламини тўлиқ эътиборсиз қолдирди, балки ўзининг разведка маълумотларини тўплаш борасидаги саъй-ҳаракатларида, асосан, такаббурлик ва ҲАМАСни яширин таҳдид, деган нотўғри тахмин туфайли муваффақиятсизликка учради.

Мақолада, шунингдек, Исроил парламенти шу йилнинг 24 июль куни оммавий норозиликларга сабаб бўлган суд-ҳуқуқ ислоҳотини маъқуллаган куни икки юқори мартабали генерал қонунчиларни давлатнинг ҳарбий аҳволи ҳақида шошилинч огоҳлантиришларни етказишга чақиргани таъкидланган.

Исроил Ҳарбий разведка бошқармаси бошлиғи Аарон Халив махфий ҳисоботларни тақдим этиб, ички тартибсизликлар Исроил мудофаасини заифлаштираётганини иддао қилган. Ҳужжатлардан бирида Эрон, ҲАМАС, Сурия, “Ҳизбуллоҳ” ва “Исломий жиҳод” етакчилари зарба бериш вақти келганига ишончи комил экани кўрсатилган.

Қайд этилишича, Халивнинг брифингини тинглаш учун парламентдан фақат икки нафар депутат келган. Шу билан бирга, Нетаньяху бу огоҳлантиришларни унга етказмоқчи бўлган қуролли кучлар бош штаб бошлиғи, генерал Герци Халеви билан учрашувдан бош тортган.