Kecha, 12-aprel kuni futbol boʻyicha Oʻzbekiston Superligasining 7-tur oʻyinlari start oldi. Kun doirasida muxlislar 3 ta oʻyinga guvoh boʻlishdi.

Turning dastlabki oʻyinida “Navbahor” klubi “Surxon” jamoasini qabul qildi. Uchrashuv 2:0 hisobida nominal mezbonlarning gʻalabasi bilan yakunlandi.

Oʻyinda hisob 26-daqiqada Aleks Fernandes tomonidan ochildi. 78-daqiqada esa Vanya Ilich “lochinlar”ning ikkinchi golini kiritdi. Shu tariqa oʻyin Timur Kapadze jamoasining gʻalabasi bilan yakunlandi.

Kunning ikkinchi oʻyinida esa “Lokomotiv” jamoasi Samarqandda “Dinamo” mehmoni boʻldi. Uchrashuvda hisob 34-daqiqada Temurxoʻja Abduxoliqov tomonidan ochildi. Oradan 7 daqiqa vaqt oʻtib, Temurxoʻjaning oʻzi “Lokomotiv”ning ikkinchi golini kiritdi. Ikkinchi boʻlimning 66-daqiqasida Azizbek Amonov hisobni bittaga qisqartirdi. Shu tariqa oʻyin Toshkent klubining 2:1 hisobidagi gʻalabasi bilan yakunlandi.

Kunni yakunlab bergan bahsda esa “Andijon” jamoasi oʻz maydonida OKMK bilan kuch sinashdi. Uchrashuv mehmonlarning 2:1 hisobidagi gʻalabasi bilan yakunlandi. Oʻyinda hisob 29-daqiqada Nodirbek Abdurazzoqov tomonidan ochildi. 36-daqiqada esa Urosh Koyich jamoasining ikkinchi toʻpini kiritdi. Ikkinchi boʻlimning 86-daqiqasida Ibrohim Yoʻldoshev “Andijon”ning yagona javob goliga mualliflik qildi. Shu tariqa oʻyinda Mirjalol Qosimov boshqaruvidagi jamoa gʻalaba qozondi.