Кеча, 12 апрель куни футбол бўйича Ўзбекистон Суперлигасининг 7-тур ўйинлари старт олди. Кун доирасида мухлислар 3 та ўйинга гувоҳ бўлишди.

Турнинг дастлабки ўйинида “Навбаҳор” клуби “Сурхон” жамоасини қабул қилди. Учрашув 2:0 ҳисобида номинал мезбонларнинг ғалабаси билан якунланди.

Ўйинда ҳисоб 26-дақиқада Алекс Фернандес томонидан очилди. 78-дақиқада эса Ваня Илич “лочинлар”нинг иккинчи голини киритди. Шу тариқа ўйин Тимур Кападзе жамоасининг ғалабаси билан якунланди.

Куннинг иккинчи ўйинида эса “Локомотив” жамоаси Самарқандда “Динамо” меҳмони бўлди. Учрашувда ҳисоб 34-дақиқада Темурхўжа Абдухолиқов томонидан очилди. Орадан 7 дақиқа вақт ўтиб, Темурхўжанинг ўзи “Локомотив”нинг иккинчи голини киритди. Иккинчи бўлимнинг 66-дақиқасида Азизбек Амонов ҳисобни биттага қисқартирди. Шу тариқа ўйин Тошкент клубининг 2:1 ҳисобидаги ғалабаси билан якунланди.

Кунни якунлаб берган баҳсда эса “Андижон” жамоаси ўз майдонида ОКМК билан куч синашди. Учрашув меҳмонларнинг 2:1 ҳисобидаги ғалабаси билан якунланди. Ўйинда ҳисоб 29-дақиқада Нодирбек Абдураззоқов томонидан очилди. 36-дақиқада эса Урош Койич жамоасининг иккинчи тўпини киритди. Иккинчи бўлимнинг 86-дақиқасида Иброҳим Йўлдошев “Андижон”нинг ягона жавоб голига муаллифлик қилди. Шу тариқа ўйинда Миржалол Қосимов бошқарувидаги жамоа ғалаба қозонди.