Foto: yhxbb.uz

23-iyul, payshanba kuni Andijon viloyati Andijon tumanida yoʻl-transport hodisasi yuz berdi.

Yoʻl harakati xavfsizligi bosh boshqarmasi matbuot xizmatining xabar berishicha, hodisa bugun soat 10:00 larda Andijon tumani Qurama MFY hududidan oʻtuvchi A-373 “Toshkent-Oʻsh” xalqaro ahamiyatdagi avtomobil yoʻlining 485-kilometrida sodir boʻlgan.

1997-yilda tugʻilgan “Nexia-3” rusumli avtomashina haydovchisi F.A. transport vositasini boshqarayotib, qarama-qarshi yoʻnalishga chiqib, haydovchi, 1980-yilda tugʻilgan A.A. boshqaruvida boʻlgan “Spark” rusumli transport vositasi bilan toʻqnashuv sodir etgan. Ushbu vaqtda yana bir haydovchi, 1981-yilda tugʻilgan N.T. “Spark” rusumli transport vositasida harakatlanib kelib “Nexia-3” rusumli avtomobil bilan toʻqnashgan.

Natijada, “Spark” haydovchisi A.A. hamda onasi 1958-yilda tugʻilgan F.A. ogʻir tan jarohatlari olib voqea joyida vafot etishgan. Ushbu avtomashina yoʻlovchisi 1986-yilda tugʻilgan D.X. tan jarohatlari olib shifoxonaga yotqizilgan.

Mazkur YTH yuzasidan Andijon tumani IIB huzuridagi TB tomonidan surishtiruv ishlari olib borilmoqda.