“Mexatronika va robototexnika: muammolar va rivojlantirish istiqbollari” mavzusidagi 2-xalqaro ilmiy-amaliy anjumanda Latviya, Litva, Portugaliya hamda Gretsiyaning nufuzli oliy taʼlim muassasalaridan 50 nafarga yaqin professor-oʻqituvchilar, doktorantlar, mustaqil izlanuvchilar hamda magistrantlar ishtirok etdi.

Tadbir davomida Litvaning Gediminas nomidagi Vilnyus texnika universiteti mexatronika va robototexnika kafedrasi professori Vitautas Buchinskas, Gretsiya xalqaro universiteti professori Kokokiris Lambros, Portugaliyaning Viana-du-Kashtelu politexnika instituti professori Duarte Nunu Maleyru Alves va boshqalar soʻzga chiqishdi. Ular tomonidan maʼruzalar oʻqildi.

— Loyiha 2019-yildan buyon amalga oshirilyapti,—deydi Andijon mashinasozlik instituti rektori Umidjon Turdialiyev. —Unda Yevropaning 5 ta hamda mamlakatimizning 7 ta oliy taʼlim muassasasi ishtirok etmoqda. Institutimiz ushbu loyihaning Milliy koordinatori hisoblanadi. Qayd etish lozim, taʼlim muassasamiz qoshida mexatronika jamiyati, oʻquv markazi hamda laboratoriyasi shakllantirildi. Mamlakatimizning 5 ta oliy taʼlim muassasasida mexatronika va robototexnika bakalavriat taʼlim yoʻnalishi boʻyicha dasturlar joriy qilindi. Shuningdek, soha xodimlari uchun malaka oshirish kurslari tashkil etildi. Bundan tashqari, onlayn taʼlim va hamkorlik uchun veb-platforma yaratildi.

Kunning ikkinchi yarmida ishtirokchilar shoʻbalarga boʻlingan holda ilmiy izlanishlar samarasini tahlil qilishdi, erishilgan yutuqlar va yechimini kutayotgan masalalar xususida munozaralar oʻtkazishdi.

Umidjon MAMARASULOV,

jurnalist.