“Мехатроника ва робототехника: муаммолар ва ривожлантириш истиқболлари” мавзусидаги 2-халқаро илмий-амалий анжуманда Латвия, Литва, Португалия ҳамда Грециянинг нуфузли олий таълим муассасаларидан 50 нафарга яқин профессор-ўқитувчилар, докторантлар, мустақил изланувчилар ҳамда магистрантлар иштирок этди.

Тадбир давомида Литванинг Гедиминас номидаги Вилнюс техника университети мехатроника ва робототехника кафедраси профессори Витаутас Бучинскас, Греция халқаро университети профессори Кококирис Ламброс, Португалиянинг Виана-ду-Каштелу политехника институти профессори Дуарте Нуну Малейру Алвес ва бошқалар сўзга чиқишди. Улар томонидан маърузалар ўқилди.

— Лойиҳа 2019 йилдан буён амалга ошириляпти,—дейди Андижон машинасозлик институти ректори Умиджон Турдиалиев. —Унда Европанинг 5 та ҳамда мамлакатимизнинг 7 та олий таълим муассасаси иштирок этмоқда. Институтимиз ушбу лойиҳанинг Миллий координатори ҳисобланади. Қайд этиш лозим, таълим муассасамиз қошида мехатроника жамияти, ўқув маркази ҳамда лабораторияси шакллантирилди. Мамлакатимизнинг 5 та олий таълим муассасасида мехатроника ва робототехника бакалавриат таълим йўналиши бўйича дастурлар жорий қилинди. Шунингдек, соҳа ходимлари учун малака ошириш курслари ташкил этилди. Бундан ташқари, онлайн таълим ва ҳамкорлик учун веб-платформа яратилди.

Куннинг иккинчи ярмида иштирокчилар шўбаларга бўлинган ҳолда илмий изланишлар самарасини таҳлил қилишди, эришилган ютуқлар ва ечимини кутаётган масалалар хусусида мунозаралар ўтказишди.

Умиджон МАМАРАСУЛОВ,

журналист.