Foto: “Xalq soʻzi”

“Aholini kichik va oʻrta biznesga keng jalb qilishning qoʻshimcha chora-tadbirlari toʻgʻrisida»gi Prezident qaroriga koʻra 2024-yilda 2 mln. aholini tadbirkorlikka jalb qilish boʻyicha quyidagi tizim joriy etiladi:

— aholi va tadbirkorlarni oʻqitish, loyihalarni amalga oshirishga koʻmaklashish va shu orqali “oilaviy tadbirkor – mikro biznes – kichik biznes – oʻrta biznes” zanjiri yoʻlga qoʻyiladi;

— “Biznesni rivojlantirish banki” ATB, “Tadbirkorlikni rivojlantirish kompaniyasi” AJ va boshqa hamkor tijorat banklaridan iborat yaxlit moliyaviy tizim asosida kichik va oʻrta biznes loyihalari moliyaviy qoʻllab-quvvatlanadi.

Shu bilan birgalikda yaqinda transformatsiyaga uchragan quyidagi tashkilotlarda 2024–2026-yillar uchun keyingi maqsadli koʻrsatkichlar (KPI) belgilanmoqda:

— Biznesni rivojlantirish banki – 150 ming kichik tadbirkorlar faoliyatini yoʻlga qoʻyish va kengaytirishga masʼul boʻladi va buning uchun xalqaro moliya tashkilotlaridan 1,2 mlrd. dollar jalb qilinadi va 300 mln dollar yevrobond chiqariladi;

— Tadbirkorlikni rivojlantirish kompaniyasi – oʻrta biznesni 2,5 baravarga (10 mingdan 25 mingga) oshirishga masʼul boʻladi va buning uchun moliyaviy xizmatlar 8 trln. soʻmdan 14 trln. soʻmga yetkaziladi, 300 mln dollar yevrobond chiqariladi hamda 450 ta korxonaga ulush kiritiladi va xizmatlar ipotekasi beriladi.