Фото: RadioSvoboda.org

АҚШ президенти Жо Байден маъмурияти америкалик қонунчилар ва собиқ дипломатларнинг мамлакатнинг Киевдаги элчихонаси фаолиятини тиклаш ҳақидаги кучайиб бораётган чақириқларига фаол қаршилик кўрсатмоқда. Бу ҳақда «Politico» нашри ёзмоқда. 

Нашрга кўра, дипломатик миссиянинг Украина пойтахтига қайтиши тарафдорлари бу қадам Россиянинг Украинадаги «махсус ҳарбий операцияси» давом этиши фонида Ғарбнинг Россия учун кучи ва бирлигидан далолат беради, деб ҳисоблашади.

Байден маъмурияти ҳозирда элчихона масаласини кўриб чиқмоқда. Аммо бу борада аниқ қарор қабул қилинмаган. Нашрнинг ёзишича, Оқ уйда америкалик дипломатларнинг хавфсизлигига ишонч йўқ. Чунки Украинада ҳарбий ҳаракатлар ҳамон давом этмоқда.

Давлат департаментининг даъво қилишича, улар дипломатларнинг Украина пойтахтига қайтиши учун аниқ саналарни айтмасдан, Киевдаги Америка дипломатик миссияси фаолиятини қайта бошлашни фаол режалаштирмоқда. Департаментдаги нашр манбалари ҳозирда АҚШ элчихонасини зудлик билан очишга тайёргарлик кўрилаётганини таъкидлаган.

Россиянинг Украинада «махсус ҳарбий операцияси» бошланиши муносабати билан АҚШ дипломатик миссияси февраль ойи охирида Киевдаги фаолиятини тўхтатган эди. Элчихонанинг қисқариши ой ўрталарида АҚШнинг «Россия босқини» хавфи ҳақидаги баёнотлари фонида бошланган. Натижада ходимларнинг бир қисми ўз ихтиёри билан Украинани тарк этган, қолганлари эса Львов ва Польшадаги консулликларга ўтказилган.