Фото: Олий Мажлис Қонунчилик палатаси

Олий Мажлис Қонунчилик палатаси Спикери Н.Исмоилов бошчилигидаги бир гуруҳ депутатларнинг Бухоро ва Навоий вилоятлари давлат ва жамият бошқаруви тизимининг турли объектлари, ижтимоий-иқтисодий соҳа муассасаларида қатор учрашувлари амалга оширилди.

Хусусан, Бухоро вилояти Вобкент туманидаги 1-сонли мактаб ва кўп тармоқли поликлиника меҳнат жамоалари, Бухоро ва Навоий вилоятларидаги бир қатор маҳаллалар фаоллари билан учрашувлар ўтказилди. Вобкент тумани ички ишлар бўлимида ҳуқуқ-тартиботни таъминлаш бўйича амалга оширилаётган ишлар билан танишилди.

Шу куннинг ўзида Навоий вилоятининг бир қатор туманлари маҳаллий Кенгашлари депутатлари ва мамлакатимиз парламенти депутатлари ўртасида фикр алмашишга бағишланган йиғилиш бўлиб ўтди.

Тадбирларнинг асосий мавзуси – жорий йилнинг 30 апрелига белгиланган Ўзбекистон Конституциясининг янги таҳрири бўйича умумхалқ референдуми.

Йиғилиш иштирокчилари ўтказилаётган референдумни сўзсиз қўллаб-қувватлашларини билдириб, унинг мамлакатимиз изчил ривожланишида тарихий аҳамият касб этишини таъкидладилар.

Сўз олганлар Ўзбекистоннинг бугунги ҳаётидан аниқ мисоллар келтириб, жамиятимиз тараққиётида катта ижобий сакраш бўлганини ва жойларда одамлар ҳаётга татбиқ этилаётган ислоҳотларнинг ортга қайтмаслиги тарафдори эканини, аввалги шарт-шароитларга қайтмасликни кафолатлайдиган нормаларни Конституция даражаси ҳар томонлама мустаҳкамлашга интилаётганларини билдирдилар.

Анора Бобомуродова Навоий шаҳар Кенгаши депутати ўз нутқида шундай деди: “Мамлакатимизнинг янгиланаётган Конституцияси қабул қилиниши учун барча имкониятларимизни ишга солишимиз керак. Дарҳақиқат, референдумга тақдим этилган лойиҳа ўз руҳи ва мазмунига кўра давлат ваколатларини ҳимоя қилувчи эмас, балки оддий фуқароларнинг ҳуқуқларини кафолатловчи ҳужжатдир. Қабул қилиниши билан у мамлакатимизнинг ҳар бир фуқароси учун “қўлланма”га айланади, чунки унда барча ҳуқуқ ва имкониятларимиз батафсил ва замонавий тарзда баён этилган.

Биз янги таҳрирдаги Конституцияни қабул қилиш масаласини ўз вақтида кўтардик. Эришилган натижаларни Бош қомус даражасида мустаҳкамлаб, келажак истиқболларини белгилаб олишимиз лозим. Ишончим комил, муваффақиятли якунланган референдумдан сўнг Ўзбекистон ўз фуқаролари номидан ишлайдиган энг демократик ва амалий жиҳатдан қимматли Конституцияга эга давлатга айланади.”