Эпштейн иши бўйича эълон қилинган материаллар янги даъволарни юзага чиқарди, деб хабар бермоқда BILD нашри.

Унда айтилишича, эълон қилинган материалларда АҚШ президенти Дональд Трампнинг собиқ бош стратеги Стив Бэннон Рим-католик черкови раҳбари Папа Францискни ағдаришни режалаштиргани ва бу борада Жеффри Эпштейндан ёрдам сўрагани маълум бўлган.

Ошкор қилинган ҳужжатларга кўра, Трампнинг биринчи муддати давомида лавозимидан четлатилган Бэннон Эпштейн билан доимий алоқада бўлиб келган. Жумладан, 2019 йилнинг 18 июнь куни Бэннон Эпштейнга «Францискни ағдариб ташлайман» деб, хабар йўллаган.

Маълум бўлишича, Бэннон Эпштейнни Франциялик журналист Фредерик Мартелнинг «Ватикан шкафта» китобини экранлаштириш лойиҳасига жалб этмоқчи бўлган ва уни фильмнинг ижрочи продюсери сифатида кўрган. 2019 йилда нашр этилган китоб Ватикандаги иккиюзламалик ва махфийликка оид даъволар билан катта шов-шувларга сабаб бўлган. Кейинчалик Мартель, Бэннон ушбу мавзуни сиёсий восита сифатида қўллаш ниятида бўлганини тасдиқлаган.

Оммавий ахборот воситаларида ёзилишича, Папа Франциск кўп йиллар давомида Бэннон учун мафкуравий рақиб бўлиб келган. Франциск миллатчиликка қарши чиқишлари ва иммиграцияни қўллаб-қувватлаши билан Бэннон қарашларига зид позицияда турган.