Трамп Исроил ва Ливан етакчилари ўртасида 34 йил ичидаги илк музокараларни эълон қилди
АҚШ Президенти Дональд Трамп 16 апрель куни Исроил ва Ливан етакчиларининг музокаралари бўлиб ўтишини маълум қилди. Тегишли пост унинг Truth Social ижтимоий тармоғидаги саҳифасида эълон қилинди.
«Исроил ва Ливан ўртасида кичик танаффус (енгиллик) яратишга ҳаракат қиляпмиз. Икки давлат раҳбарлари мулоқот қилганига анча вақт бўлди, тахминан 34 йил. Бу эртага содир бўлади. Жуда соз!» — деб ёзди Америка етакчиси.
Аввалроқ Исроил Бош вазири Биньямин Нетаньяҳу ҳукуматга Ливан билан тўғридан-тўғри музокараларни имкон қадар тезроқ бошлашни буюрганини маълум қилган эди. Бундан олдин Трамп телефон орқали мулоқотда Эрон билан тузилган сулҳ жараёни бузилмаслиги учун Нетаньяҳудан Ливанга берилаётган зарбаларни камайтиришни сўраган.
Хорижий ОАВларнинг қайд этишича, яқин орада Исроил ва Ливаннинг «Ҳизбуллоҳ» гуруҳи ўртасида ўт очишни тўхтатиш тартиби эълон қилиниши мумкин.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг