Иллюстратив фото

Манбанинг маълум қилишича, сифатсиз дори воситалари ишлаб чиқаришга қарши махсус ҳаракатнинг биринчи босқичида 76 корхонага нисбатан чора кўрилган.

Сифатсиз дори-дармонларни ишлаб чиқаришга қарши кенг қамровли чора-тадбирлар натижасида марказий ва давлат назорат органлари 76 фармацевтика компаниясида биргаликда текширув ўтказди. Улардан 18 тасида сохта дори воситалари ишлаб чиқаргани учун лицензиялари бекор қилди. Текширувлар сўнгги 15 кун ичида мамлакат бўйлаб ўтказилган.

Манбанинг маълум қилишича, сифатсиз дори воситалари ишлаб чиқаришга қарши махсус ҳаракатнинг биринчи босқичида 76 корхонага нисбатан чора кўрилган.

«Сохта дори воситалари ишлаб чиқариш ҳамда ишлаб чиқариш амалиёти қоидаларини бузганлик учун 18 та фармацевтика компаниясининг лицензиялари бекор қилинди. Бундан ташқари, яна 26 тасига сабаблар юзасидан огоҳлантириш берилди», дейилади манбада. Манбада айнан қайси компанияларнинг лицензиялари бекор қилингани айтилмаган.

Таъкидлашича, махсус ҳаракат доирасида регуляторлар 203 та фирмани аниқлаган. Компанияларнинг аксарияти Ҳимачал-Прадеш, Уттаракханд ва Мадхя Прадеш штатларида фаолият олиб борган.

Сўнгги пайтларда Ҳиндистонда жойлашган компаниялар томонидан ишлаб чиқарилган дори-дармонларнинг сифати ҳақида саволлар пайдо бўлди.

Февраль ойида Тамил Надуда жойлашган «Global Pharma Healthcare» компанияси кўз томчилари АҚШда кўриш қобилиятини йўқотиш билан боғлиқ салбий таъсирларга сабаб бўлгани маълум бўлганди. Бунгача Ҳиндистонда ишлаб чиқарилган йўтал сироплари ўтган йили Гамбия ва Ўзбекистонда болалар ўлимига алоқадорлиги аниқланган эди.

Хусусан, 2022 йил декабрь ойида Самарқандда «Док-1 Мах» препаратидан 18 нафар бола вафот этган эди. Шундан кейин Фармацевтика агентлиги собиқ раҳбари Сардор Кариев, шунингдек, «ДОК-1 Мах» ва «АМБРОНОЛ» сиропи ножўя таъсири сабабли «ўткир буйрак етишмовчилиги» ташхиси билан болалар вафоти бўйича қўзғатилган жиноят иши тергови доирасида бир қатор мансабдор жиноий жавобгарликка тортилган эди.

«Ўзбекистон Соғлиқни сақлаш вазирлигининг сифат назорати миллий лабораториялари томонидан ўтказилган «Марион Биотеч» компанияси томонидан ишлаб чиқарилган «Амбронол» ва «ДОК-1 Мах» сироплари намуналарининг лаборатория таҳлили шуни кўрсатдики, ҳар иккала маҳсулотда ҳам заҳар моддалар сифатида қабул қилиб бўлмайдиган миқдорда диетилен гликол ва этилен гликол мавжуд», дея қайд этганди ЖССТ ўз баёнотида.