Сенатнинг Фан, таълим ва соғлиқни сақлаш масалалари қўмитасида шаҳарсозликда ногиронлиги бўлган шахсларнинг эҳтиёжларини таъминлаш ҳамда ижтимоий инфратузилма объектларидан монеликсиз фойдаланиши учун шароит яратиш масаласи муҳокама қилинди.

Масаланинг муҳимлигидан келиб чиқиб, муҳокама жараёнида Қурилиш ва уй-жой коммунал хўжалиги вазирлиги, Адлия вазирлиги, Ижтимоий ҳимоя миллий агентлиги масъул ходимлари ҳамда ногиронлиги бўлган шахсларнинг жамоат бирлашмалари вакиллари ҳам иштирок этди.

Таъкидланганидек, 2022 йилда Сенат Кенгаши мажлисида шаҳарсозликда ногиронлиги бўлган шахсларнинг эҳтиёжларини таъминлаш ва барча ижтимоий инфратузилма объектларидан тўсиқсиз фойдаланиш учун шароит яратиш масаласи кўтарилиб, Кенгашнинг тегишли қарори қабул қилинган эди. Бу борада масъул вазирлик ҳамда идоралар томонидан қатор ишлар амалга оширилганлиги қайд этилди.

Шу билан бирга, Қурилиш ва уй-жой коммунал хўжалиги вазирлиги томонидан ногиронлиги бўлган шахсларнинг жамоат бирлашмалари вакиллари ижтимоий-маиший ва маданий мақсадларга мўлжалланган қурилиш объектлари ҳамда реконструкция қилинаётган объектларни фойдаланиш учун рухсатнома беришда иштирок этишига тегишли рухсатнома берилмаётганлигига эътибор қаратилди.

Мажлисда Адлия вазирлиги мутахассислари томонидан қабул қилинган норматив-ҳуқуқий ҳужжатларга кўра, ногиронлиги бўлган шахсларнинг жамоат бирлашмалари вакиллари ижтимоий-маиший ва маданий мақсадларга мўлжалланган қурилиш объектларини ҳамда реконструкция қилинаётган объектларни фойдаланишга қабул қилишда ва фойдаланишга рухсатнома беришда иштирок этишлари белгилаб қўйилганлиги қайд этилди.

Сенаторлар томонидан яқин бир йил давомида Тошкент шаҳрида қуриб фойдаланишга топширилган айрим ижтимоий-маиший объектларда ўрганиш ўтказганиллиги, ўрганиш давомида мазкур объектларда ногиронлиги бўлган шахсларнинг тўсиқсиз ҳаракатланишлари учун етарли шароит (пандус, лифт, махсус тутқичлар ва ҳ.к.) яратилмаганлиги аниқлангани ҳақида маълумот берилди.

Мазкур ҳолатлардан келиб чиқиб, Қурилиш ва уй-жой коммунал хўжалиги вазирлиги масъулларига ер майдони ҳажмидан қатъи назар, барча турдаги бинолар, иншоотлар, якка тартибдаги уй-жойлар, кўп квартирали уйларни қуриш ёки реконструкция қилишда лойиҳа-смета ҳужжатларини тайёрлаш жараёнида ногиронлиги бўлган шахсларнинг жамоат бирлашмалари вакилларининг иштирок этиши юзасидан норматив-ҳуқуқий ҳужжатларга ўзгартириш киритиш бўйича таклиф тайёрлаш вазифаси топширилди.

Шунингдек, ногиронлиги бўлган шахсларнинг жамоат бирлашмалари вакилларининг ижтимоий-маиший ва маданий мақсадларга мўлжалланган қурилиш объектларини ҳамда реконструкция қилинаётган объектларни фойдаланиш учун рухсатнома беришда иштирок этиши учун имконият яратиш бўйича ҳам вазифалар белгиланди.

Мажлис якунида қўмитанинг тегишли қарори қабул қилинди.

«Халқ сўзи».