Эрон Олий раҳбари Мужтабо Хоманаий авиазарба натижасида олган юзи ва оёқларидаги оғир жароҳатлардан сўнг тикланиш жараёнини ўтамоқда. Бу ҳақда Reuters агентлиги Хоманаийнинг яқин атрофидаги манбаларига таяниб хабар бермоқда.

Таъкидланишича, АҚШ ва Исроилнинг Эронга қарши операциясининг биринчи кунида Теҳрон марказидаги қароргоҳга берилган зарба оқибатида Мужтабо Хоманаийнинг юзи таниб бўлмас даражада шикастланган. Шунингдек, у иккала оёғидан ҳам жиддий жароҳат олган.

Манбаларнинг қайд этишича, Ислом Республикаси Олий раҳбарининг ақли расолиги сақланиб қолган. Хусусан, у юқори лавозимли амалдорлар билан аудиоконференциялар орқали йиғилишлар ўтказмоқда ва муҳим масалалар, жумладан, АҚШ билан музокаралар бўйича қарорлар қабул қилишда иштирок этмоқда.

Reutersʼнинг ёзишича, олинган маълумотлар Хоманаийнинг сўнгги бир неча ҳафта ичидаги ҳолати ҳақидаги энг батафсил тавсифдир, бироқ агентлик ушбу маълумотларни мустақил равишда тасдиқлай олмаган.

Эслатиб ўтамиз, Мужтабо Хоманаий 28 февраль куни яраланган эди. Унинг отаси, мамлакатнинг аввалги Олий раҳбари Али Хоманаий эса ҳалок бўлган.

Аввалроқ The Times газетаси Мужтабо Хоманаий ҳушсиз ҳолатда экани ва Қум шаҳрида даволанаётгани ҳақида хабар берган эди. Эрон Ташқи ишлар вазири ўринбосари Саид Хатибзода эса Олий раҳбарнинг аҳволи яхшилигини ва у мамлакатни бошқараётганини маълум қилган.