Путин Россияга чеклов қўллаган давлатларга жавоб санкцияларини акс эттирган ҳужжатни имзолади
Фото: Открытые Медиа
Россия президенти Владимир Путин «АҚШ ва уларга қўшилган хорижий давлатлар ва халқаро ташкилотларнинг нодўстона ҳаракатлари муносабати билан» махсус иқтисодий чораларни қўллаш тўғрисидаги фармонни имзолади. Бу ҳақда «Медуза» хабар қилди.
Маълум қилинишича, ушбу ҳужжат бугун, 1 мартдан кучга киради.
Шунингдек, фармонга кўра, 1 мартдан бошлаб Россия фуқаролари:
хориж валютасини хориждаги банклар ва молия ташкилотларида очилган ҳисобрақам ва омонатларига ўтказа олмайди;
хориждаги тўлов хизмати кўрсатувчилар (банк ҳисобрақамини очмасдан) электрон тўлов воситаларидан фойдаланган ҳолда пул ўтказмаларини амалга ошира олмайди;
қарз шартномалари бўйича норезидентларга хориж валютасини ўтказа олмайди.
Бундан ташқари, ташқи иқтисодий фаолиятда иштирок этувчи Россия резидентлари товарлар ва хизматларни Россияда фуқаролиги бўлмаган шахсларга сотиш бўйича шартномалар асосида ўз ҳисоб варақларига киритилган валюта тушумларининг 80 фоизини сотишлари шарт.
Бу тартиб фармон кучга кирган кундан бошлаб уч кундан кечиктирмай амалга оширилиши керак.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг