Россия Президенти Владимир Путин Пасха муносабати билан ўт очишни тўхтатиш ҳақида эълон қилди, деб хабар бермоқда Кремль матбуот хизмати.

«Россия Федерацияси Қуролли Кучлари олий бош қўмондони В.В. Путиннинг қарори билан яқинлашиб келаётган православларнинг Пасха байрами (Масиҳнинг нурли тирилиши) муносабати билан 2026 йил 11 апрель соат 16:00 дан 12 апрель куни якунига қадар ўт очишни тўхтатиш эълон қилинади», — дейилади хабарда.

Россия қўшинлари Пасха сулҳи вақтида барча йўналишларда ҳарбий ҳаракатларни тўхтатиш бўйича кўрсатма олдилар.

«Қўшинлар душман томонидан содир этилиши мумкин бўлган провокациялар, шунингдек, унинг ҳар қандай тажовузкор ҳаракатларига чек қўйишга тайёр бўлсин», — деб ёзилган хабар матнида.

Кремль, шунингдек, Россия Украинанинг ҳам Пасха байрамида Москванинг ўрнак олишига ва сулҳ эълон қилишига умид қилаётганини таъкидлади.

«Биз Украина томони Россия Федерациясининг ўрнагига эргашишидан келиб чиқмоқдамиз», — дейилади хабарда.

Эслатиб ўтамиз, 2025 йилда ҳам Владимир Путин Пасха байрамида бир ярим кунга ҳарбий ҳаракатларни тўхтатиш ҳақида эълон қилган эди. Ўшанда низолашувчи томонлар бир-бирларини кўплаб қоидабузарликларда айблашган, бироқ шу билан бирга ҳарбий ҳаракатлар шиддати сезиларли даражада пасайган эди.