«Креатив иқтисодиётни ривожлантириш чора-тадбирлари тўғрисида»ги Президент қарори (ПҚ–64-сон, 16.02.2026 й.) қабул қилинди. Бу ҳақида «Ҳуқуқий ахборот» Telegram-канали хабар берди.

Унда айтилишича, мазкур қарорга кўра, 2030 йилга қадар креатив иқтисодиётни ривожлантиришнинг асосий мақсадли кўрсаткичлари этиб қуйидагилар белгиланган:

• креатив иқтисодиётнинг ялпи ички маҳсулотдаги улушини 5 фоизга – 145 трлн сўмга етказиш;
• креатив индустрия маҳсулотлари ва хизматлари экспортини 1 млрд АҚШ долларидан ошириш;
• соҳада амалга оширилаётган лойиҳалар доирасида иш ўринларини 500 мингтага етказиш.

Шунингдек, 2026–2027 йилларда 1-босқичда қуйидагилардан иборат Креатив индустрия парки инфратузилмалари давлат-хусусий шериклик асосида ташкил этилади:

• сайр этиш, дам олиш ва ҳордиқ чиқариш, арт-объект ва монументал санъат асарлари ҳудудларидан иборат яшил боғ;
• рақамли дизайн ва дастурлаш йўналишида нуфузли халқаро мактаб;
• бук-кафе, спорт ва воркаут майдончалари, меҳмонхона;
• бадиий ижодкорлар павильони, креатив устахоналар, экологик офис хоналари ва коворкинг маркази.