Маълумки, бу йил олий таълим даргоҳларига ўқишга кириш учун тест синовлари 2 сентябрдан бошланди. Мамлакатимизнинг барча ҳудудларидаги каби Хоразм вилоятида ҳам тест синовлари карантин талабларига риоя қилинган ҳолда, қатъий тартиб интизом асосида ўтди.

— Жорий йилда вилоят бўйича 77 972 нафар абитуриент тест синовларида қатнашиш учун рўйхатдан ўтган,  — дейди Давлат тест марказининг Хоразм вилояти бўлими бошлиғи Бахтиёр Яқубов. —​ Пандемия шароитидан келиб чиқиб тест синовлари Урганч шаҳридаги 3 та ўйингоҳда ўтказилди. Бир вақтнинг ўзида 3600 нафар абитуриентни жойлаштириш сиғимига эга ушбу ўйингоҳлар замонавий кузатув камералари билан жиҳозланган бўлиб, ота-оналар ўз фарзандининг синовдан ўтиш жараёнини интернет тармоғи орқали кузатиб бордилар. Тест синовларига киритилаётган абитуриентларнинг тана ҳарорати ўлчаниб, бир марта ишлатиладиган ниқоб, қўлқоп ва бошқа зарур антисептик воситалар билан таъминланди. Ҳар куни икки сменада жами 7200 нафар абитуриент тест топширди ва ушбу масъулиятли жараённи белгиланган муддатда муваффақиятли якунладик.

—​ Урганч давлат университетининг кимё йўналишига ҳужжат топширганман, —​ дейди тест синовларини топшириб чиққан абитуриентлардан бири Озода Ражабова. —​ Мамлакатимизда кимё ва биология фанларини ривожлантириш, ушбу йўналишларда таълим сифати ва илм-фан натижадорлигини ошириш «Илм, маърифат ва рақамли иқтисодиёт йили» Давлат дастурининг устувор вазифалари қаторида белгиланган.Яқинда Президентимизнинг бу юзадан махсус қарори ҳам қабул қилинди. Орзуим ушбу йўналишда таҳсил олиб туманимизда янги ташкил этиладиган кимё ва биология фанларига ихтисослаштирилган таянч мактабда ёшларга сабоқ бериш.

Одилбек Одамбоев,
«Халқ сўзи»