Фото: AP

Исроилнинг Ғазодаги қуруқликдаги операциясининг 3-босқичи тез орада якунланишини кутилмоқда.

Исроил Америка Қўшма Штатларига Ғазо секторидаги Фаластиннинг ҲАМАС ҳаракатига қарши қуруқликдаги операциянинг учинчи босқичи доирасидаги фаол жанговар ҳаракатларнинг жорий босқичи 2-3 ҳафта ичида якунланиши кераклиги ҳақида маълум қилган. Бу ҳақда “CBS News” икки америкалик расмийга таяниб хабар бермоқда.

Икки америкалик мулозимга кўра, исроилликлар АҚШга ҲАМАСга қарши ҳужумларининг жорий босқичи, кучли ҳаво ҳужумлари ва қуруқликдаги йирик операция яқин 2-3 ҳафта ичида якунланиши кераклигини билдирган.

Америкалик мулозимлардан бирининг огоҳлантиришича, қуруқликдаги операциянинг учинчи босқичининг якунланиши жанглар тугашини англатмайди. Балки бу унинг шиддатининг пасайишини, портлашлар сонининг камайишини ва аниқроқ зарбаларга эътибор қаратилшини, шунингдек, Исроил ҲАМАСнинг қолган етакчиларини таъқиб қилишда давом этишини англатади.

Шу йилнинг 14 декабрь куни АҚШ миллий хавфсизлик бўйича маслаҳатчиси Жейк Салливан билан учрашувда Исроил мудофаа вазири кейинги рейдлар узоқ давом этиши мумкинлигини башорат қилиб, уруш бир неча ойдан кўпроқ давом этишини айтганди.

Шу билан бирга, АҚШ президенти Жо Байден Исроилни ҲАМАСга қарши ҳарбий операция давомида тинч аҳолини ҳимоя қилишга чақирди, деб хабар бермоқда телеканал. Шу ҳафта бошида президент Байден Исроил бош вазири Бинямин Нетаньяху ҳукумати аҳоли зич жойлашган ҳудуддаги тартибсиз портлашлар туфайли халқаро ёрдамни йўқотаётгани ҳақида огоҳлантирган эди.

Аввалроқ, Америка расмийларига кўра, Исроилнинг Ғазо секторидаги қуруқликдаги операциясининг жорий босқичи январь ойигача давом этиши, шундан сўнг Исроил мудофаа кучлари Фаластиннинг ҲАМАС ҳаракати жангчиларига мақсадли зарбалар бериш стратегиясига ўтиши ҳақида хабар берилган эди.