Исроил мамлакат сиёсий раҳбариятининг қарорини ижро этган ҳолда Эронга берилаётган зарбаларни тўхтатди. Бу ҳақда ТАСС хабар бермоқда.

Шу билан бирга, яҳудий давлати Ливанда «Ҳизбуллоҳ» бўлинмаларига қарши жанговар ҳаракатларни давом эттириш ниятида.

«Сиёсий раҳбариятнинг кўрсатмаларига мувофиқ, Исроил Мудофаа армияси Эронга қарши кампанияда ўт очишни тўхтатади, юқори жанговар шайлик ҳолатида туради ва ҳар қандай қоидабузарликка жавоб беришга тайёр. Шу билан бирга, Исроил Мудофаа армияси Ливанда «Ҳизбуллоҳ» террорчилик ташкилотига қарши жанговар ҳаракатлар ва қуруқликдаги операцияларни давом эттиради», — дейилади Исроил армияси баёнотида.

Аввалроқ Америка етакчиси Дональд Трамп Ҳўрмуз бўғози зудлик билан очилиши шарти билан АҚШ Эронни бомбардимон қилишни икки ҳафтага тўхтатишини маълум қилган эди.

Эрон ҳукумати сулҳга розилигини тасдиқлади. Теҳроннинг расмий баёнотида айтилишича, мамлакат «буюк ғалабага эришди ва жиноятчи Американи ўзининг ўн банддан иборат режасини қабул қилишга мажбур этди».

Эрон Ташқи ишлар вазири Аббос Ароқчи алоҳида хабарида икки ҳафта давомида кемалар Эрон ҳарбийлари билан ўз ҳаракатларини мувофиқлаштирган ҳолда Ҳўрмуз бўғози орқали ўтишлари мумкинлигини тасдиқлади.

Исроил Бош вазири Биньямин Нетаньяҳу маъмурияти яҳудий давлати АҚШ Президенти Дональд Трампнинг Эрон билан икки ҳафталик сулҳ тузиш қарорини қўллаб-қувватлашини билдирди.