Фото: Халқ сўзи

Бухоролик таниқли заргар Алишер Ҳайдаров ҳозиргача 500 дан зиёд турдаги тақинчоқларни тайёрлаган. Заргарликнинг нафақат Бухоро, балки Хоразм, Самарқанд, Қашқадарё, Сурхондарёга хос қадимий услубларини ҳам чуқур билади. Китоб варақлайди, музейларга кириб, унутилган, йўқолиб кетган ноёб заргарлик буюмларини излайди. Топган заҳоти уларнинг нусхасини тайёрлашга киришади.

— АҚШнинг Санта-Фе шаҳри (Ню-Мексико штати)да ўтказиладиган анъанавий Бутунжаҳон ҳунармандлар фестивалида иштирок этдим. Мен тайёрлаган заргарлик маҳсулотлари тадбирга келган бир гуруҳ Голливуд юлдузларининг диққатини тортди, — дейди ҳунар ортидан дунё кезган ҳамюртимиз. — Улар мендан тиллақоши, кўкрак қафасга тақиладиган ёпинғич харид қилишди. Айниқса, ёш болаларнинг тилла ва кумушдан тайёрланган қадимий сўрғичига астойдил қизиқиб қолишди. Унга кўпгина буюртма беришди. Тайёрлаб бердим, албатта.

Қатор нуфузли халқаро кўргазмаларда фаол қатнашиб, ўзбек халқ амалий санъати довруғини дунёга танитаётган заргарнинг таъкидлашича, қадимда аждодларимиз сўрғични атайлаб тилла ёки кумушдан тайёрлашган. Негаки, бундай сўрғич инфекцияни йўқотиш хусусиятига эга. Илгари турли доривор гиёҳлар аралашмаси, бухороча айтганда, қанду рўған шу сўрғич орқали болага берилган. Бундай сўрғич бола оғиз бўшлиғининг ҳам ишончли ҳимоячиси бўлган. Касаллик келиб чиқишига йўл қўймаган.

Тажрибали ҳунарманднинг уй-музейида ҳозир халқимизнинг бой тарихидан дарак берувчи юзлаб ана шундай осори атиқаларни кўриш мумкин.

Истам ИБРОҲИМОВ, «Халқ сўзи».