Фото: “Халқ сўзи”

Ўзбекистон Республикаси Қишлоқ хўжалиги вазири Азиз Воитовнинг аграр соҳада жойлардаги ислоҳотлар изчиллигини таъминлаш, олиб борилаётган ишлар билан танишиш мақсадида Фарғона вилоятида ишчи ташриф билан бўлиб тургани ҳақида хабар берган эдик.

Вазир Учкўприк тумани “Боғибўстон” МФЙ ҳудудида “Учкўприк Vegetable Business” МЧЖ томонидан ташкил этилган иссиқхона мажмуасини ҳам кўздан кечирди.

Иссиқхонанинг умумий майдони 3 гектарни ташкил этади. Бу ерга ширин қалампирнинг “Ferrari” нави экилган бўлиб, у асосан Қозоғистон Республикасига экспорт қилинади. Ушбу навнинг сифати юқорилиги ва эти гўштлилиги боис, гастрономик бизнесда унга талаб кундан-кунга ошиб бормоқда.

Тўлиқ кўмир ёқилғисида иситишга мўлжалланган иссиқхонада етиштирилаётган ширин қалампирнинг гектаридан 160 тоннагача ҳосил олиш кўзда тутилган.

Вазирнинг ташриф дастури бўйича кейинги манзил Бағдод туманининг “Дашт” МФЙ ҳудудида жойлашган “Ғофуржон деҳқон” МЧЖга қарашли наслчилик йўналишидаги чорвачилик комплекси бўлди.

Ушбу фермада айни вақтда 810 бош қорамол боқилмоқда. Бир кунда ўрта ҳисобда 10 тонна сут соғиб олинади. Битта сигир ўртача ҳисобда 27,6-28 литр атрофида сут бермоқда. Сутларнинг ёғлилик даражаси 3,8 — 4%.

Бундан ташқари учрашувда бугунги кундаги озуқа-ем базасини арзонлаштириш масалалари атрофлича муҳокама қилинди.

Четдан олиб келинаётган озуқани ўзимизда ишлаб чиқариш учун маҳаллий ишлаб чиқарувчилар томонидан ўзлаштириш ва нархини арзонлаштириш масалалари бўйича аниқ чора-тадбирлар ишлаб чиқиш белгилаб олинди.