Халқ депутатлари Наманган вилояти ва шаҳар Кенгашлари депутати Наримон Деҳқонов фаол ноиблардан ҳисобланади. У бир муддат аввал ўқувчиларни пул эвазига хизмат кўрсатувчи ва таваккалчиликка асосланган ўйинларга жалб қилаётган «кран-автомат» аппаратлари ҳамда компьютер ўйинлари фаолиятини ўрганиш юзасидан вилоят давлат солиқ бошқармаси бошлиғи номига депутатлик сўрови юборган эди.

— Сўровда ушбу ўйин аппаратлари ўрнатилишининг қонунийлиги, шунингдек, уларнинг амалдаги лицензия талабларига мувофиқлиги масаласи қўйилган эди, — дейди Н. Деҳқонов. — Мутахассислар масалани ўрганибгина қолмасдан мазкур йўналишдаги шохобчаларни тартибга солиш юзасидан аниқ тадбирларни ҳам амалга оширдилар. Мурожаатим асосида вилоят ҳудудида кенг қамровли хатлов ишлари амалга оширилди. Ўрганишлар давомида жами 531 та тадбиркорлик субъекти фаолияти таҳлил қилинди. Айни жараёнда қатор қонунбузилиш ҳолатлари ҳам аниқланди. Жумладан, 190 та ҳолатда тадбиркорлик фаолияти тегишли ҳужжатларсиз олиб борилаётганлиги маълум бўлди. Масъул ташкилотлар томонидан кўрилган чоралар ва берилган огоҳлантиришлар натижасида 84 та субъект белгиланган тартибда давлат рўйхатидан ўтказилди, 234 таси эса ихтиёрий равишда ўз фаолиятини тўхтатди.

Маҳаллий Кенгаш депутатининг жонкуярлиги билан бугун Наманганда тадбиркорликнинг юқоридаги йўналиши анчагина тартибга тушган. Жойларда компьютер ўйинлари қонуний асосда ташкил этилиб, бозор муносабатларида шаффофликни таъминланаётгани, бу билан ёшларни турли носоғлом иллатлардан асрашга алоҳида аҳамият қаратилаётганлигидан айниқса педагог ва ота-оналар хурсанд.

Қудратилла НАЖМИДДИНОВ, «Халқ сўзи».