Фото: Reuters

БМТ Украинанинг тинчлик ва трибунал бўйича резолюцияларини ишлаб чиқишда иштирок этмаслигини маълум қилди.

Бирлашган Миллатлар Ташкилоти (БМТ) Украинанинг тинчлик ва трибунал бўйича резолюциялари лойиҳалари устида ишлашда иштирок этмайди. Бу ҳақда ташкилот бош котибининг расмий вакили Стефан Дюжаррик маълум қилди.

«Биз резолюция бўйича музокараларда иштирок этмаймиз», деди у. Шу билан бирга, расмийнинг таъкидлашича, БМТга аъзо бўлган алоҳида давлатлар бу жараёнда иштирок этмоқда.

Эслатиб ўтамиз, аввалроқ Украина ташқи ишлар вазирининг биринчи ўринбосари Эмине Жапарова мамлакат 2023 йилда БМТ Бош Ассамблеясининг Россия бўйича махсус трибунал ташкил этиш бўйича резолюция лойиҳасини муҳокамага қўйишини маълум қилганди. 

Унинг таъкидлашича, мамлакатнинг БМТдаги доимий вакили Сергей Кислица иш олиб боради ва бу қарорни қабул қилиш учун фавқулодда навбатдан ташқари сессия чақирилиши мумкин. Шу муносабат билан дипломат ташкилотга аъзо мамлакатларни Киев жорий йилда БМТ Бош Ассамблеясига тақдим этмоқчи бўлган махсус механизм яратишни қўллаб-қувватлашга чақирди.