АҚШ президентлигига демократлар партиясидан номзод Жозеф Байден амалдаги давлат раҳбари Доналд Трампни коронавирус инфекцияси хавфи ҳақида сукут сақлаганликда айблаб чиқди. У бу ҳақда ўзининг Твиттердаги саҳифасида ёзган.

«У кўп ойлар давомида бизни алдаб келди. Ва мамлакатимизда қотил касаллик йўлида учраган барча нарсаларни супуриб кетса ҳам, у онгли равишда ўзига юкланган мажбуриятларни бажармади. Бу америкаликларнинг ҳаёти ва ўлимига боғлиқ хиёнатдир», — дея қайд этиб ўтган сиёсатчи.

Шу кунларда Америка оммавий ахборот воситаларида Washington Post газетаси шарҳловчиси Боб Вудворднинг «Ғазаб» китобидан парчалар бериляпти. Унда журналист Трамп пандемия бошланишидан олдин янги типдаги коронавирус ҳақида тасаввурга эга бўлгани, ҳатто 7 февраль куни Covid-19 гриппга нисбатан беш марта ҳалокатли эканлигини таъкидлаганини тасдиқлайди. Айнан мана шундай чиқишлар Байденнинг юқоридаги кўринишда баёнот беришига сабаб бўлган.

Эслатиб ўтамиз, Дональд Трамп 4 сентябрь куни АҚШда коронавирусга қарши яратилаётган вакцина октябрь ойида тайёр бўлишини эълон қилганди. Ушбу дорини ишлаб чиқиш билан бирданига учта йирик фармацевтика компания шуғулланмоқда. Оқ уй раҳбари вакцина «аъло даража»да бўлиши, чунки у «жуда зўр» компаниялар томонидан яратилаётганига урғу берган.

Жонс Хопкинс университети маълумотларига кўра, АҚШда пандемия бошлангандан буён ковидни юқтирганлар сони 6,3 млн. кишига етган бўлса, 190 мингдан ортиқ ўлим ҳолати қайд этилган.