Фото: Ташқи ишлар вазирлигининг «Дунё» ахборот агентлиги

Тантанали тадбир аввалида АҚШ Давлат котибининг Жанубий ва Марказий Осиё бўйича ёрдамчиси Доналд Лу АҚШнинг Ўзбекистондаги янги элчисининг касбий фазилатларига юқори баҳо берди. Унинг таъкидлашича, элчи дипломат сифатида халқ дипломатияси, инқирозларни бошқариш ва низоларнинг олдини олишда катта тажрибага эга. Доналд Лу унинг Колумбия университетида ишлаган давридаги ва кейинчалик Тошкентдаги АҚШ элчихонасининг учинчи котиби (1994-1996 йй.) лавозимига тайинланганидан бери Марказий Осиё бўйича чуқур билимга эга эканлиги ҳақида тўхталар экан, Жонатан Хеник ўзининг иш тажрибаси орқали АҚШ-Ўзбекистон муносабатларини янада чуқурлаштиришига ишонч билдирди.

Ўз навбатида, Жонатан Хеник ўзига билдирилган юксак ишонч учун миннатдорлик изҳор этиб, АҚШ номидан Ўзбекистонда вакиллик қилиш дипломат ҳаётидаги катта шараф эканини таъкидлади. У 1990 йиллар бошида университет талабаси сифатида Ўзбекистонга биринчи сафарини ва Тошкентдаги илк дипломатик вазифасини ёдга олди. Америкалик дипломат ўшандаёқ Ўзбекистон халқининг ўзига хос меҳмондўстлиги, самимийлиги ва меҳрибонлигига амин бўлганини таъкидлади.

У АҚШ-Ўзбекистон стратегик шериклигини ҳар томонлама ривожлантириш, Ўзбекистон мустақиллиги, суверенитети ва хавфсизлигини, шунингдек, мамлакатнинг демократик ва иқтисодий ривожланишини янада қўллаб-қувватлаш учун барча саъй-ҳаракатларини амалга оширишга ваъда берди.

Ўзбекистон элчихонаси хабарига кўра, расмий маросимдан сўнг бўлиб ўтган учрашувда Жавлон Ваҳобов ва Жонатан Хеник Ўзбекистон-Америка ҳамкорлигининг бугунги ҳолати ва ривожланиш истиқболларини муҳокама қилдилар. Томонларнинг конструктив сиёсий мулоқотни кенгайтиришга ўзаро тайёр эканлиги таъкидланди. Савдо, сармоя, қишлоқ хўжалиги, таълим, туризм ва маданий-гуманитар ҳамкорлик соҳаларида икки томонлама муносабатларни ривожлантириш учун салмоқли салоҳият мавжудлиги қайд этилди.

Эслатиб ўтамиз: Жонатан Хеник 2019-2022 йилларда Тошкентдаги АҚШ дипломатик миссиясини бошқарган ва АҚШ Сенати томонидан Қозоғистондаги янги элчи этиб тасдиқланган Дениел Розенблюм ўрнига Ўзбекистондаги элчи лавозимига тайинланган.

Янги элчи келгунига қадар АҚШнинг Ўзбекистондаги Муваққат ишлар вакили вазифасини дипломатик миссия раҳбари ўринбосари Пол Политис бажаради.