АҚШ Қуролли Кучлари Марказий қўмондонлиги (CENTCOM) Эрон портларига кирувчи ва у ердан чиқувчи барча денгиз трафигини блокада қилишни бошлашга ваъда бермоқда. Тегишли пост Х ижтимоий тармоғида эълон қилинди.

«CENTCOM президент эълонига мувофиқ, 13 апрель куни Шарқий соҳил вақти билан соат 10:00 да Эрон портларига кирадиган ва чиқадиган барча денгиз трафиги блокадасини амалга оширишни бошлайди», — дейилади хабарда.

Мазкур чора ҳар қандай мамлакат кемаларига дахл қилади, аммо фақат улар Эрон портлари ва соҳилбўйи ҳудудларига ёки у ердан ҳаракатланаётган бўлсагина. Бу Форс ва Уммон кўрфазларидаги барча Эрон портларига тааллуқлидир.

Баёнотга кўра, CENTCOM кучлари Ҳўрмуз бўғози орқали Эронга тегишли бўлмаган портларга йўл олган ёки у ердан келаётган кемаларнинг эркин ҳаракатланишига тўсқинлик қилмайди.

Ўтган дам олиш кунлари АҚШ Президенти Дональд Трамп Ҳўрмуз бўғози блокада қилинишини эълон қилган эди. У Америка ҳарбийлари бўғоздан фойдаланишга уринган барча кемаларни тўхтатишини таъкидлади.

Эслатиб ўтамиз, 11–12 апрель кунлари Исломободда бўлиб ўтган АҚШ ва Эрон ўртасидаги музокаралар натижасиз якунланган эди.