Jizzax viloyati Sharof Rashidov tumanida “Cobalt” rusumli mashina yonib ketdi. Viloyat YHXB axborot xizmati holat yuzasidan maʼlumot berdi.

Bildirilishicha, bugun, 15-iyun kuni soat 12:50 larda, Sharof Rashidov tumani hududidan oʻtgan xalqaro ahamiyatga ega M39 avtomobil yoʻlining 998 км.да Navoiy viloyati Xatirchi tumanida yashovchi 1977-yilda tugʻilgan haydovchi boshqaruvidagi “Cobalt” rusumli avtomashinada elektr simlarining qisqa tutashuvi tufayli yongʻin sodir boʻlib, motor va salon qismi yongan.

Alanga FVB tomonidan bartaraf etilgan. Yongʻin oqibatida tan jarohati olganlar yoʻq.

Qoʻshimcha qilinishicha, hozirda yongʻin sababi va keltirilgan moddiy zarar miqdori aniqlanmoqda. Tergovga qadar tekshiruvni tuman FVB olib bormoqda.

Eslatib oʻtamiz, bugun, 15-iyun kuni soat 11:30 larda Uchtepa tumani TXAY koʻchasi 18- avtobuslar saroyi qarshisida “Mercedes — Benz” transport vositasining salon qismidagi elektr simlarida qisqa tutashuv boʻlganligi sababli , yongʻin kelib chiqishi oqibatida toʻliq yonib ketgandi.

Shuningdek, bugunning oʻzida, soat 11:35 larda Sergeli tumani Lutfikor koʻchasida “Mercedes-Benz” rusumli transport vositasida yongʻin kelib chiqdi va oqibatda yoʻlovchi avtobusi toʻliq yonib ketdi.