Pandemiya sharoitiga qaramasdan davlat tashabbusi bilan xorijdagi fuqarolarimiz charter aviareyslar orqali Oʻzbekiston Respublikasiga olib kelinmoqda.

Ana shunday charter reyslar orqali «Vnukovo-Samarqand» yoʻnalishi Samarqand xalqaro aeroportiga uchib kelgan fuqaro S.B. “yashil” yoʻlak orqali bojxona nazoratidan harakatlanadi. Fuqaroning xatti-harakatlari bojxonachilarning eʼtiborini tortdi, - deb xabar bermoqda Samarqand viloyati bojxona boshqarmasi axborot xizmati.

Natijada uning bagaj sumkasi xolislar ishtirokida koʻzdan kechirilganda jismoniy shaxslar tomonidan olib kirilishi taqiqlangan 1 dona “SKY QUEST DRONE” nomli uchuvchisiz uchish apparati borligi aniqlandi.

Hozirda ushbu holat yuzasidan bojxona organlari tomonidan surishtiruv harakatlari davom ettirilmoqda.

Eslatib oʻtamiz, Oʻzbekiston Respublikasining “Oʻzbekiston Respublikasining Jinoyat, Jinoyat-protsessual kodekslariga hamda Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartish va qoʻshimchalar kiritish haqida”gi OʻRQ-534-sonli Qonunning 1-moddasiga asosan, Oʻzbekiston Respublikasining Jinoyat kodeksi 2444-moddasi bilan toʻldirilgan boʻlib, uchuvchisiz uchadigan apparatlarni qonunga xilof ravishda olib kirish, oʻtkazish, olish, saqlash yoki ulardan foydalanish boʻyicha jinoiy javobgarlik belgilangan.

Abdulaziz Yoʻldoshev
(Xalq soʻzi)