Foto: Tashqi ishlar vazirligi matbuot xizmati

2022-yil 17-noyabr kuni Samarqand shahrida “Yevropa Ittifoqi va Markaziy Osiyo oʻzaro bogʻliqligi: barqaror rivojlanish uchun global darvoza” xalqaro konferensiyasi doirasida Oʻzbekiston Respublikasi Tashqi ishlar vaziri Vladimir Norov Tojikiston Respublikasi Tashqi ishlar vaziri Sirojiddin Muxriddin bilan uchrashuv oʻtkazdi.

Oʻzbekiston-Tojikiston doʻstlik va yaxshi qoʻshnichilik munosabatlari, turli sohalardagi strategik sheriklik va ittifoqchilikning dolzarb masalalari muhokama qilindi.

Ikki mamlakat rahbarlarining birgalikdagi saʼy-harakatlari tufayli soʻnggi yillarda ikki tomonlama hamkorlikni rivojlantirishda misli koʻrilmagan yutuqlarga erishilgani taʼkidlandi.

Tomonlarning oliy darajadagi kelishuvlarni har tomonlama amalga oshirish boʻyicha saʼy-harakatlarni muvofiqlashtirishga tayyorligi haqida xabar berildi.

Parlamentlar, hukumatlar va tarmoq vazirliklari orqali faol muloqot oʻtkazish muhimligi taʼkidlandi.

Savdo-iqtisodiy hamkorlikni kengaytirish, tovar ayirboshlash koʻrsatkichlarini yanada oshirish, ikki mamlakat mintaqalarining toʻgʻridan-toʻgʻri aloqalarini qoʻllab-quvvatlash, energetika, sanoat, qishloq xoʻjaligi va boshqa sohalarda kooperatsiya loyihalarini amalga oshirish boʻyicha takliflar, shu jumladan Oʻzbekiston-Tojikiston investitsiya kompaniyasi mablagʻlari hisobidan koʻrib chiqildi.

Suv-energetika resurslaridan oqilona foydalanish va barqaror transport-kommunikatsiya aloqalarini rivojlantirish boʻyicha hamkorlikni davom ettirishga kelishib olindi.

Xalqaro institutlar doirasidagi tomonlarning oʻzaro hamkorligi, shuningdek, mintaqaviy siyosatning ayrim masalalari yuzasidan fikr almashildi.