Oʻzbekiston Badiiy akademiyasi Toshkent fotosuratlar uyida Pokiston mustaqilligining 76 yilligiga  bagʻishlangan  “Goʻzal Pokiston” nomli koʻrgazma ochildi.

Ekspozitsiya Oʻzbekistonda Shanxay hamkorlik tashkilotining Xalq diplomatiyasi markazi tomonidan  Pokiston elchixonasi  bilan hamkorlikda tashkil etildi.

Koʻrgazmaning tantanali ochilish marosimida SHHT Xalq diplomatiyasi markazi, Pokiston elchixonasi, Badiiy akademiya, Oʻzbekiston Transport vazirligi vakillari, ijodiy hamjamiyat, Toshkentda akkreditatsiyadan oʻtgan diplomatik vakolatxonalar rahbarlari, shuningdek, Toshkent davlat sharqshunoslik universiteti, Jahon iqtisodiyoti va diplomatiya universiteti hamda Oʻzbekiston davlat  jahon tillari universiteti talabalari ishtirok etishdi.

Ekspozitsiyada Oʻzbekiston va Pokiston oʻrtasidagi ikki tomonlama munosabatlarni aks ettiruvchi boy badiiy syujetli 80 dan ortiq suratlar namoyish etilmoqda. Shuningdek, suratlarda Pokiston tarixi, meʼmorchiligi, sanʼati va tabiatining oʻziga xosligi aks ettirilgan boʻlib, ular ushbu mamlakatning yorqinligini namoyish etadi.

Koʻrgazma 11-avgustga qadar davom etadi.