6-mart kuni Oʻzbekiston tasviriy sanʼat galereyasida “Ayolga qasida” nomli koʻrgazma ochildi. Ushbu tadbir 8-mart – Xalqaro xotin-qizlar kuniga bagʻishlangan boʻlib, unda “Oʻzmilliybank” toʻplamidagi noyob asarlar namoyish etiladi. Koʻrgazmaning asosiy gʻoyasi – sanʼatdagi ayol obrazini aks ettirishdir.

Ayol nafosat, donolik va hayotbaxsh kuch ramzi sifatida asrlar davomida sanʼatkorlarning ilhom manbai boʻlib kelgan. Koʻrgazma doirasida turli avlod vakillari boʻlgan rassomlarning asarlari tomoshabinlarga taqdim etildi. Har bir ijodkor oʻz uslubi orqali ayol tabiati, uning his-tuygʻulari, maʼnaviy kuch-qudrati va hassosligini ifoda etgan.

Koʻrgazma faqat ayollarning goʻzallik timsoli ekanligini aks ettirish bilan cheklanmaydi, balki ularning ijtimoiy tenglik, taʼlim, mehnat va siyosatdagi faol ishtirok uchun kurashgan uzoq va murakkab yoʻlini ham yodga oladi. Bu tarixiy jarayonlar bugungi kuchli, erkin va oʻz maqsadlariga intiluvchi ayol obrazini shakllantirgan.

Ekspozitsiyada oʻzbek sanʼatining taniqli rassomlari tomonidan yaratilgan asarlar namoyish etiladi. Ular qatorida A.Abdullayev, I.Tursunnazarov, R.Taktash, N.Kashina, R.Choriyev, A.Allaberganov, R.Axmedov, R.Gagloyeva, F.Ahmadaliyev, L.Ibragimova, A.Nur, M.Isanov, Sh.Hakimov, R.Akramov, L.Babayeva va S.Jabbarov kabi ijodkorlar bor. Har bir rassom ayol obrazini oʻziga xos uslub va avtorlik texnikasi orqali talqin qilgan.

Koʻrgazmada 100 dan ortiq asarlar oʻrin olgan boʻlib, ular turli janr va yoʻnalishlarda yaratilgan. Asarlarning badiiy yechimlari xilma-xilligi tomoshabinlarga ayol qiyofalarining koʻp qirraliligini his qilish va har bir asarga singdirilgan maʼnolar chuqurligini anglash imkoniyatini beradi.

“Ayolga qasida” koʻrgazmasi sanʼat va tomoshabin oʻrtasidagi muloqotni taʼminlab, har bir tashrif buyuruvchini madaniyat, tarix va zamonaviy hayotda ayollarning roli haqida oʻylashga chorlaydi. Bu tadbir ayollarning nafaqat ijtimoiy, balki maʼnaviy kuch-qudrati va goʻzalligini sanʼat vositasida koʻrish uchun ajoyib imkoniyatdir.