Oliy Majlis Senati Raisi, Oʻzbekiston velosport federatsiyasi raisi Tanzila Narbayeva Osiyo velosport konfederatsiyasining yangi saylangan prezidenti Dato Amarjit Singx bilan uchrashuv oʻtkazdi.

Uchrashuvda Oʻzbekiston velosport federatsiyasi va Osiyo velosport konfederatsiyasi oʻrtasidagi hamkorlikni yanada kengaytirish masalalari muhokama qilindi.

Suhbat chogʻida mamlakatimizda velosport davlat siyosati darajasida qoʻllab-quvvatlanayotgani, zamonaviy infratuzilma yaratilgani hamda sportchilarning xalqaro maydondagi natijalari izchil oʻsib borayotgani qayd etdi. Xususan, milliy va paravelosport terma jamoalarining Olimpiya oʻyinlari va jahon musobaqalaridagi ishtiroki mamlakat yuqori salohiyatini namoyon etayotgani taʼkidlandi.

Tomonlar Hamkorlik toʻgʻrisidagi bitim imzoladi. Bitim doirasida Oʻzbekistonda mintaqaviy oʻquv-trening markazi tashkil etish, xalqaro musobaqalarni Konfederatsiya taqvimida kengaytirish, mutaxassislar tayyorlash boʻyicha qoʻshma dasturlarni amalga oshirish, shuningdek, ayollar va paravelosportni qoʻllab-quvvatlash yuzasidan amalga oshirilayotgan ishlarni faollashtirishga kelishib olindi.