Oliy Majlis Senati Raisi Tanzila Narbayeva Jeneva shahrida Xalqaro mehnat tashkilotining Yevropa va Markaziy Osiyo mamlakatlari boʻyicha mintaqaviy byurosi direktori Beata Andres bilan uchrashuv oʻtkazdi.

Muloqot chogʻida Oʻzbekistonda mehnat sohasida amalga oshirilayotgan islohotlar hamda XMTning soʻnggi tavsiyalari asosida mehnat qonunchiligini takomillashtirish yoʻnalishida olib borilayotgan ishlar haqida fikr almashildi.

B. Andres davlatimiz tomonidan kambagʻallikni qisqartirish va fuqarolar uchun munosib mehnat sharoitlarini yaratish borasidagi qatʼiy siyosatini alohida taʼkidladi.

Shuningdek, Yuriy Shterkning katta koordinator etib tayinlanishi hamda Oʻzbekistonda XMTning mamlakat ofisini ochish tashabbusi uzoq muddatli hamkorlikni mustahkamlash yoʻlidagi muhim qadam sifatida eʼtirof etildi.

Suhbat chogʻida 2026–2030-yillarga moʻljallangan Munosib mehnat boʻyicha mamlakat dasturini ishlab chiqish, shuningdek, ish beruvchilar, kasaba uyushmalari va mehnat inspeksiyasi mutaxassislarining malakasini oshirish borasidagi hamkorlikni kengaytirish masalalari ham koʻrib chiqildi.