Oʻzbekistonning San-Marinoga tayinlangan birinchi elchisi Abat Fayzullayev (qarorgohi Rimda joylashgan) mazkur davlat rahbarlari – Kapitan-regentlar Francheska Chiverkya va Dalibor Rikkardiga ishonch yorliqlarini topshirdi. Bu haqda “Dunyo” axborot agentligi xabar qildi.

Tantanali marosimda mamlakat tashqi ishlar vaziri Luka Bekkari Oʻzbekiston va San-Marino oʻrtasidagi aloqalarni rivojlantirishga qaratilgan saʼy-harakatlarni, jumladan, ushbu mamlakatga birinchi elchining tayinlanishini yuqori baholadi.

Shuningdek, Oʻzbekistonning iqlim oʻzgarishi va barqaror rivojlanish boʻyicha olib borayotgan siyosati eʼtirof etildi. Tomonlar oʻzaro savdo-iqtisodiy hamkorlikni rivojlantirish, huquqiy bazani mustahkamlash va xalqaro tashkilotlar doirasida qoʻllab-quvvatlash borasida kelishuvlarga erishdi.

Oʻzbekiston va San-Marino oʻrtasidagi diplomatik munosabatlar 2021-yil 3-fevralda oʻrnatilgan. Mamlakat Yevropada joylashgan dunyodagi eng kichkina davlatlardan biri. U Italiya hududida, Apennin togʻlarida joylashgan boʻlib, butunlay Italiya bilan oʻralgan.

Eslatib oʻtamiz, Abat Fayzullayev 2023-yil noyabr oyidan buyon Oʻzbekistonning Italiyadagi elchisi va Rimdagi xalqaro tashkilotlar (FAO, JSST, UNODC) huzuridagi doimiy vakili hamda 2024-yil dekabr oyidan boshlab Respublikamizning Kipr va Maltadagi elchisi sifatida faoliyat yuritib kelmoqda.