Foto: Namangan FVB

Namangan viloyatida joylashgan uylardan birida yirik yongʻin yuz berdi. Bu haqda viloyat Favqulodda vaziyatlar boshqarmasi xabar berdi.

Qayd etilishicha, bugun, 24-mart kuni soat 12:15 da Uychi tumani “Jiydakapa” MFYdagi xonadonlardan birida yongʻin sodir boʻlayotgani haqida xabar kelib tushgan.

Shunga asosan, yongʻin qutqaruvchilar soat 12:30 da hodisa joyiga yetib borib, 12:32 da alangani oʻrab olgan va oradan 18 daqiqa oʻtib uni toʻliq bartaraf etgan.

Dastlabki maʼlumotlarga koʻra, yongʻin oqibatida xonadonning 45 kv. m maydonda shift va tom qismi butunlay yonib zararlangan. Shuningdek, qutqaruvchilar binoning 350 kv. m maydonini yongʻindan saqlab qolgan.

Samarqand viloyat FVBning maʼlum qilishicha, 24-mart kuniga oʻtar kechasi soat 23:29 larda Samarqand shahri Xishrav qoʻrgʻoni “Chilquduq” MFY hududidan oqib oʻtuvchi kanal boʻyidagi toʻqayzorda yongʻin sodir boʻlgan.

Voqea joyiga 3 ta yongʻin-qutqaruv ekipajlari jalb etilgan. Ular yongʻinga soat 23:36 da yetib borgan va soat 00:30 da alanga toʻliq bartaraf etilgan. Taʼkidlanishicha, hodisa oqibatida halok boʻlgan va jabrlanganlar yoʻq.

Hozirda yuqoridagi har ikki holat yuzasidan tergovga qadar surishtiruv ishlari olib borilmoqda.