Joriy yilning 29-aprel kuni soat 16:00 dan soat 18:00 ga qadar Samarqand viloyati hududida kuzatilgan kuchli yomgʻir oqibatida Samarqand shahrining Galaosiyo, Soʻzangaron, Mirzo Ulugʻbek, Shohi Zinda, Tunukasozlar, Oybek va Izboskan koʻchalari hududiga yigʻilgan oqava suvlarining ariqlardan toshib chiqishi sababli 8 nafar fuqaroning hovlisi va yertoʻlalariga suv kirganligi kuzatildi.

Samarqand viloyati favqulodda vaziyatlar boshqarmasi axborot xizmatining xabariga koʻra, jala oqibatlarini bartaraf etishga viloyat favqulodda vaziyatlar boshqarmasidan 6 ta maxsus texnika va 44 nafar shaxsiy tarkib vakillari, obodonlashtirish boshqarmasi, “Suvoqava” DUKdan 8 ta maxsus texnika va 52 nafar ishchi-xodimlar jalb qilindi.

Shuningdek, “Toshkent-Samarqand-Buxoro” M-37A avtomobil yoʻlining 39-40 kilometrdagi yomgʻir suvlarining ariqqa sigʻmasdan oqib tushishi tufayli yoʻlning 2-3 metri, chuqurligi 1,5 metr va kengligi 0,6 metrlik qismi yuvilib ketgan. Uni bartaraf etish maqsadida ishlar olib borilmoqda.

Shiddatli yomgʻir sabab Bulungʻur tumani markazining Alisher Navoiy koʻchasidagi 19-uy, Furqat koʻchasidagi 24-uy, Baxshi koʻchasidagi 10-uy, Sharof Rashidov koʻchasidagi 14-uy, Spitamen koʻchasidagi 60-uy, Sohibkor koʻchasidagi 25 “A”-uy, Chamanzor koʻchasidagi 12-uy va Hamid Olimjon koʻchasidagi 6-uyning hovlisiga suv oqib kirgan. Bulungʻur tumani obodonlashtirish boʻlimi tomonidan aholiga yordam koʻrsatilmoqda.

Shuningdek, M-37 avtomobil yoʻlining Bulungʻur tumaniga tutash Yuqori nuqta post-maskani hududida ham surunkali yomgʻir suvlari avtomobil yoʻliga chiqib ketib, yoʻlda soat 17:00 dan soat 17:40 gacha vaqtincha bir tomonlama qatnov yoʻlga qoʻyildi. Ushbu holat zudlik bilan bartaraf etilib, avtomobil qatnovi yoʻlga qoʻyildi.

Abdulaziz Yoʻldoshev

(Xalq soʻzi)