Illyustrativ foto

Qozogʻiston taʼlim va ilm-fan vazirligi yangi oʻquv yilini boshlashning uch xil yoʻlini koʻrib chiqmoqda. Bu haqda vazir Asxat Aymagambetov maʼlum qildi, deb xabar berdi «Kazinform».

Birinchi variant — bu masofadan oʻqitish. Chekka hududlar bundan mustasno.

Ikkinchi variant — bu aralash, yaʼni bevosita maktabga borish va masofadan taʼlim berish.

«Bunda cheklovlar qoʻyiladi: maktablarda termometrlar, sanitayzerlar mavjud boʻlishi, masofa saqlanishi, qisqartirilgan darslar oʻtilishi shart, — deydi vazir. — Bular guruhchalar, kabinet tizimining bekor qilinishi va boshqalar deganidir».

Uchinchi variant — bu qatʼiy sanitariya cheklovlari joriy etiladigan odatdagi tizim. “Bolalar borib oʻqishadi, ammo tanaffuslar, sinflarning toʻldirilishi, “smenalar”, kabinet tizimining bekor qilinishidan tortib oshxonaga kirib-chiqish jadvali rejimigacha boʻlgan cheklovlar amalda boʻladi”, — dedi Aymagambetov.

Rasmiy maʼlumotlarga koʻra, Qozogʻistonda 12-iyul ertalabki holatda koronavirusni yuqtirganlar soni 1798 taga koʻpaygan, shulardan 1061 nafari simptomsiz. Mamlakatda ushbu infeksiyaga chalinganlar soni 58 mingdan oshib ketdi, ulardan 33 mingdan ziyodi tuzaldi.