Foto: Akmal Muhammadov/“Xalq soʻzi”

Senatning navbatdagi yalpi majlisida “Qoʻriqlash faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonun koʻrib chiqildi.

Mazkur hujjat jamoat xavfsizligini taʼminlash, fuqarolar va tashkilotlarning mol-mulkini himoya qilish, shuningdek qoʻriqlash faoliyati sohasidagi davlat siyosatini zamonaviy talablarga mos ravishda takomillashtirishga qaratilganligi taʼkidlandi.

Qonun bilan Maʼmuriy javobgarlik toʻgʻrisidagi kodeks hamda “Ichki ishlar organlari toʻgʻrisida”gi, “Qoʻriqlash faoliyati toʻgʻrisida”gi, “Litsenziyalash, ruxsat berish va xabardor qilish tartib-taomillari toʻgʻrisida”gi qonunlarga oʻzgartirish va qoʻshimchalar kiritilmoqda.

Xususan, ayrim maʼmuriy huquqbuzarliklarni, jumladan jamoat joylarida tamaki mahsulotini isteʼmol qilish, noqonuniy ov qilish, daraxtlarni kesish va boshqa ekologik qoidabuzarliklarni koʻrib chiqish vakolati Ichki ishlar vazirligi huzuridagi Qoʻriqlash departamentining masʼul xodimlariga berilmoqda.

Shuningdek, qoʻriqlashning texnik vositalarini loyihalashtirish va ularga xizmat koʻrsatish boʻyicha ruxsatnoma berish vakolatini Ichki ishlar vazirligiga oʻtkazish, tadbirkorlik subyektlari uchun esa xabardor qilish tartibini joriy etish nazarda tutilmoqda.

Muhokamada soʻzga chiqqanlar ushbu Qonun jamoat xavfsizligini mustahkamlash, aholi tinchligi va “Inson qadri – oliy qadriyat” tamoyilini amalda taʼminlashga xizmat qilishini taʼkidladi.

Senatorlarning fikricha, mazkur Qonunda xavfsizlikni taʼminlashda jazolashga emas, balki profilaktikaga hamda jamoat tartibi, profilaktika va qoʻriqlash faoliyati yagona tizim sifatida samarali ishlashiga ustuvor ahamiyat beriladi.

Senatorlar Qonunni maʼqulladi.