Toshkentda “Yangiobod” va “Qoʻyliq” bozorlarida reyd oʻtkazilib, hayvonlarning qonunga xilof ravishda sotilayotgani aniqlandi. Bu haqda Ekologiya, atrof-muhitni muhofaza qilish va iqlim oʻzgarishi vazirligi maʼlum qildi.

Reyd davomida “Qoʻyliq” bozori hududida Qizil kitobga kiritilgan 5 ta sharq boʻgʻma iloni noqonuniy sotilayotganligi maʼlum boʻldi. Ilonlar Toshkent hayvonot bogʻiga topshirilgan.

Huquqbuzarga nisbatan Maʼmuriy javobgarlik toʻgʻrisidagi kodeksning 92-moddasi bilan maʼmuriy bayonnoma rasmiylashtirilib, bazaviy hisoblash miqdorining 10 baravari, yaʼni 3 million 750 ming soʻm miqdorida jarima belgilandi.

Shuningdek, reyd davomida noqonuniy sotilayotgan boshqa hayvon va qushlar ham aniqlanib, tabiatga qoʻyib yuborildi. Huquqbuzarlarga nisbatan tegishli tartibda choralar belgilandi.

Avvalroq “Navoiy” chegara bojxona posti noyob ilonlarni chet davlatga olib oʻtmoqchi boʻlgan fuqaro qoʻlga olingani haqida xabar qilgandik. Unda Qizil kitobga kiritilgan, tabiiy populyatsiyani saqlash maqsadida himoya qilinadigan 15 dona “Kolvar” turiga mansub tirik ilonlar olingan.