Davlatimiz rahbari Konstitutsiyaviy komissiya aʼzolari bilan uchrashuvida mavzuni davom ettirib, shunday dedi:

“Bu savollarning barchasiga javobni puxta ishlangan huquqiy normalar orqali Konstitutsiyamizda aks ettirish – davr taqozosidir.

Maʼlumki, Asosiy qonunimizning 12-moddasida hech qaysi mafkura davlat mafkurasi sifatida oʻrnatilishi mumkin emasligi qayd etilgan. Bu – oʻta muhim va juda toʻgʻri belgilangan konstitutsiyaviy qoidadir. 

Chinakam xalq mafkurasini, millatning eng muqaddas orzu-intilishlarini faqat uning Bosh hujjati – Konstitutsiyasida toʻliq ifoda etish mumkin. 

Yangilangan Konstitutsiya mamlakatimizning uzoq muddatli taraqqiyot strategiyalari, umuman yurtimiz va xalqimizning ertangi farovon hayoti uchun mustahkam huquqiy asos hamda ishonchli kafolat yaratishi lozim.

“Inson qadri uchun” gʻoyasini hamda hozirgi islohotlarimizning bosh tamoyili boʻlgan “Inson – jamiyat – davlat” degan yondashuvni Konstitutsiyamizning mazmuniga chuqur singdirib, amaliy hayotimizda bosh qadriyatga aylantirishimiz zarur.

Yaʼni, insonning qadr-qimmati, shaʼni va gʻururi bundan buyon barcha sohalarda birinchi oʻrinda turishi kerak".