Pokistonda zilzila vaqtida 200 dan ortiq mahbus qamoqdan qochib ketdi
Illyustrativ foto
Pokistonning janubida joylashgan Karachi shahrida favqulodda holat yuz berdi. 2-iyun kuni 200 dan ortiq mahbus qamoqxonadan qochib ketdi. Bu haqda Reuters xabar qildi.
Shu kuni yer silkinishlari sababli Malir qamoqxonasida mahbuslarga kameralarini tark etishga ruxsat berilgan. Shu sababli, 6000 dan ortiq odam saqlanadigan qamoqxonada muammolar kelib chiqqan. Tartibsizliklardan foydalangan mahbuslar qochib ketishga muvaffaq boʻlishgan.
Qochib ketgan 216 nafar mahkumlarning 80 ga yaqini allaqachon qoʻlga olingan. Afsuski, operatsiya paytida bir kishi halok boʻlgan, yana uch nafar xavfsizlik xodimi turli darajadagi jarohatlar olgan. Hozirda qidirish ishlari davom ettirilmoqda.
Barcha qochqinlarning shaxsi aniqlangan boʻlib, ularning qarindoshlari yashaydigan joylar va ularga tutash hududlarda reydlar oʻtkazilmoqda.
Sind viloyati ichki ishlar rahbari Ziyo ul-Hasan Lanjar bu mamlakatdagi qamoqxonalardan soʻnggi yillardagi eng yirik qochish ekanini taʼkidlagan.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring