“AsiaMoney” jurnali tomonidan oʻtkazilgan “2020-yilning eng yaxshi banki” (Bestbankawards -2020) tanlovida “Oʻzsanoatqurilishbank” ATB “Eng yaxshi mahalliy bank” nominatsiyasi boʻyicha gʻolib deb topildi.

Nashr ekspertlari bankni mamlakatdagi eng yirik kredit muassasasi sifatida qayd etib, soʻnggi 12 oydagi faoliyatini tahlil qilgan. Oʻzbekiston Respublikasi Markaziy bankining joriy yil 1-fevral holatiga bergan maʼlumotlariga koʻra, aktivlari oʻtgan yilning shu davridagiga nisbatan 15,4 foizga oʻsib, 35,4 trln. soʻmni tashkil qilganligini qayd etgan. Bankning 2018-yilda oʻtkazgan rebrending ishlariga, maxsus ishga tushirilgan “SQB Premium” ofisi faoliyatiga hamda davlat miqyosidagi keng infratuzilmasiga toʻxtalib, “garchi muassasa raqamli banking inqilobiga ishonsa-da, mamlakatdagi eng katta mijozlar bazasiga ega tashkilot sifatida oʻz xizmat koʻrsatish tuzilmalarini rivojlantirishda davom etmoqda”, deya fikr bildirgan.

“AsiaMoney” xabarida “Oʻzsanoatqurilishbank”ning oʻtgan yil noyabr oyida London fond birjasida joylashtirgan 300 mln. dollar hajmidagi yevrobondlari ahamiyati alohida qayd etilgan. Jahon fond bozoriga chiqishda Oʻzbekiston banklari orasida ilk muhim qadam boʻlganligi taʼkidlangan.

Shuningdek, tahlilchilar bankning kredit siyosatini ham yuqori baholab, mamlakatning dunyo moliya bozoriga integratsiyalashuvida omil boʻluvchi xalqaro moliya institutlari bilan hamkorligini tilga olgan.

Bank asosiy korporativ kredit tashkiloti ekanligi, xususan, 2019-yilda kredit resurslarining 49 foizi yirik korxonalarga, 40 foizi kichik biznes va xususiy tadbirkorlik subyektlariga, qolgan qismi esa chakana mijozlarga ajratilganligi dalil qilib keltirilgan.

“Oʻzbekistonda biznesni rivojlantirish imkoniyatlari juda keng. Ammo, “Oʻzsanoatqurilishbank” kabi kredit tashkilotlari koʻmagi bilan ushbu jarayonlar yana-da jadallashishi, shubhasizdir”, deyiladi xabarda.

Maʼlumot uchun: mazkur tanlovi xalqaro doiradagi nufuzli moliyaviy nashr —“AsiaMoney” jurnali tomonidan har yili anʼanaviy tarzda Osiyo Tinch okeani mintaqasidagi davlatlar banklari oʻrtasida oʻtkazib kelinadi. Bunda har bir mamlakat banklarining soʻnggi bir yilda qaysi yoʻnalishlarda faol ish yuritganini baholash maqsad qilingan. Gʻoliblar “Eng yaxshi mahalliy bank”, “Eng yaxshi korporativ va investitsiya banki”, “Eng yaxshi xalqaro bank”, “Kichik va oʻrta biznesga eng yaxshi xizmat koʻrsatgan bank”, “Eng yaxshi raqamli bank”, “Korporativ ijtimoiy masʼullik jihatidan eng yaxshi bank”, “Mikromoliyaviy xizmatlar koʻrsatish boʻyicha eng yaxshi bank” kabi nominatsiyalar doirasida ragʻbatlantiriladi.
Bank Axborot xizmati.
Reklama huquqi asosida.