Oʻzbekiston Respublikasi Prezidenti Shavkat Mirziyoyev Iqtisodiy hamkorlik tashkiloti sammitida ishtirok etish uchun Toshkent shahriga kelgan Turkmaniston Prezidenti Serdar Berdimuhamedov bilan uchrashuv oʻtkazdi.

Suhbat avvalida Turkmaniston Prezidenti Turkman xalqining milliy yetakchisi, Turkmaniston Xalq Maslahati Raisi Gurbanguli Berdimuhamedovning salomi va eng ezgu tilaklarini yetkazdi.

Ikki tomonlama munosabatlarning dolzarb masalalari hamda oliy darajadagi kelishuvlar ijrosi batafsil koʻrib chiqildi.

Tomonlar Oʻzbekiston bilan Turkmaniston oʻrtasidagi koʻp qirrali hamkorlik va chuqurlashgan strategik sheriklik izchil rivojlanib, mustahkamlanib borayotganini mamnuniyat bilan qayd etdilar.

Savdo, sanoat, energetika, suv xoʻjaligi, transport va boshqa ustuvor yoʻnalishlarda amaliy hamkorlik kengaymoqda.

Hududlararo va madaniy-gumanitar aloqalar faol. Joriy yil oktyabr oyida Turkmaniston va Oʻzbekiston madaniyat kunlari muvaffaqiyatli oʻtkazildi.

Ikki mamlakat Prezidentlari mintaqaviy kun tartibi va koʻp tomonlama tuzilmalar doirasidagi hamkorlik masalalarini koʻrib chiqdilar.