Oʻzbekiston va Tojikiston yetakchilari ikki tomonlama kun tartibining dolzarb masalalarini muhokama qildilar
Oʻzbekiston Respublikasi Prezidenti Shavkat Mirziyoyev 18-may kuni Sian shahrida oʻtayotgan Markaziy Osiyo mamlakatlari va Xitoy sammiti doirasida Tojikiston Respublikasi Prezidenti Emomali Rahmon bilan uchrashuv oʻtkazdi.
Oʻzbekiston bilan Tojikiston oʻrtasidagi koʻp qirrali hamkorlikni yanada rivojlantirish, strategik sheriklik va ittifoqchilik munosabatlarini kengaytirishning dolzarb masalalari koʻrib chiqildi.
Yetakchilar iqtisodiy hamkorlik boʻyicha Hukumatlararo qoʻshma komissiyaning 12-may kuni Toshkent shahrida oʻtgan navbatdagi yigʻilishining samarali yakunlarini yuksak baholadilar.
Oʻzaro tovar ayirboshlash hajmini oshirish va sanoat kooperatsiyasi loyihalarini, shu jumladan energetika, mashinasozlik, qishloq xoʻjaligi, transport-kommunikatsiya va boshqa tarmoqlarda ilgari surish boʻyicha qabul qilingan qarorlarni amalda bajarish muhimligi taʼkidlandi.
Oʻzbekiston va Tojikiston rahbarlari mintaqaviy kun tartibidagi dolzarb masalalar yuzasidan ham fikr almashdilar, boʻlajak tadbirlar rejasini koʻrib chiqdilar.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring