Foto: Illustrativ foto

Sogʻliqni saqlash vaziri Amrillo Inoyatov boshchiligidagi Oʻzbekiston delegatsiyasi 12-19-oktabr kunlari amaliy tashrif bilan Germaniyada boʻlib turibdi.

Delegatsiya vakillari Germaniyaga tashrif doirasida “Aesculap” rahbariyati bilan uchrashuv oʻtkazdi. Unda hamkorlik istiqbollari muhokama qilindi.

Muloqot natijasida “Aesculap” akademiyasida 10 nafar oʻzbekistonlik jarrohlar orasidan yetakchi professional trenerlarni tayyorlash va Toshkent shahrida “Aesculap” akademiyasi filialini ochish boʻyicha kelishuvlarga erishildi.

Ushbu kelishuvlar oʻzbekistonlik tibbiyot mutaxassislari uchun oʻz malakasini oshirish, tibbiyot sohasidagi ilgʻor uslub va texnologiyalarni oʻzlashtirishda beqiyos imkoniyat taqdim etadi. Shuningdek, oʻzbekistonlik boʻlgʻusi tibbiyot xodimlari va mutaxassislarga sohaning dunyodagi yetakchi akademiyasida taʼlim olish, jahon standartlariga javob beradigan asbob-uskunalar va texnologiyalardan foydalanishni oʻrganish uchun sharoit yaratadi.

Bundan tashqari, Oʻzbekiston tibbiyot oliy taʼlim muassasalarida mazkur akademiyaning 11 ta boʻlimini ochish rejalashtirilgan.