Foto: «Xalq soʻzi»

Joriy yilning 14-mart kuni Dushanbe shahridagi Tojikiston milliy universitetida “Oʻzbekiston Respublikasi va Tojikiston Respublikasi oliy taʼlim, fan va innovatsiyalar sohasidagi ikki tomonlama aloqalar milliy iqtisodiyotni rivojlantirish asosi” mavzusida Oʻzbekiston—Tojikiston Birinchi rektorlar forumi boʻlib oʻtdi. Mazkur forumda Oʻzbekiston Respublikasi Oliy taʼlim, fan va innovatsiyalar vaziri I. Abdurahmonov boshchiligidagi 19 ta oliy taʼlim muassasasidan rektor va prorektorlardan iborat delegatsiya ishtirok etdi.

Ushbu tadbir Oʻzbekiston va Tojikiston Prezidentlarining ikki tomonlama aloqalarni yanada rivojlantirishdagi oʻzaro saʼy-harakatlari hamda strategik sheriklikning yana bir misolidir. Forumda Tojikistonning 40 dan ortiq universitetlari rektorlari, ilmiy doira vakillari, professorlari , jami 300 dan ortiq ishtirokchi qatnashdi.

Anjumanni Tojikiston Respublikasi Taʼlim va fan vaziri R. Saidzoda va Oʻzbekiston Oliy taʼlim, fan va innovatsiyalar vaziri I. Abdurahmonov kirish soʻzi bilan ochdilar. Vazirlar Forumni ikki davlat ziyolilari oʻrtasida muloqot oʻrnatish uchun yaratilgan imkoniyatlarning samarasi sifatida baholab, endigi navbat ikki davlat olimlari va professor-oʻqituvchilari oʻrtasida doʻstlikni mustahkamlash ekanini taʼkidladilar.

— Oʻzbekiston-Tojikiston Birinchi rektorlar forumi uzoq kutilgan tadbirlardan biri va u universitetlar oʻrtasida yangi loyihalarni amalga oshirishga xizmat qiladi, — dedi R Saidzoda.

Shuningdek, Tojikiston milliy universiteti rektori Q. Hushvaqtzoda soʻnggi yillarda oʻzaro aloqalarda ijobiy dinamika kuzatilayotganini, bunda davlatlarimiz Rahbarlarining uzoqni koʻzlab olib borayotgan siyosatlari, oʻzaro ishonchga asoslangan ochiq muloqotlari hamda ushbu uchrashuvlar chogʻida erishilgan kelishuvlar muhim ahamiyat kasb etayotganini taʼkidladi.

Shu bilan birga, rasmiy ochilishda Tojikiston milliy universiteti rektori Q. Xushvaqtzoda Oʻzbekiston Prezidentining ikki tomonlama munosabatlarda mavjud boʻlgan barcha masalalarni yechish boʻyicha amalga oshirgan saʼy-harakatlari Tojikistonda yuksak qadrlanishini, ikki mamlakat oʻrtasidagi chegaralar ochilib, transport tizimlari tiklanib, fuqarolarning erkin bordi-keldi qilishlari uchun imkoniyatlar yaratilgani bugungi kunda Tojikiston milliy universitetidagi oʻzbek talabalarning soni oshganligidan koʻrish mumkinligini aytdi.

Ishtirokchilar forumning “Oliy taʼlim sohasida ikki tomonlama hamkorlik: ustuvor vazifalar va rivojlanish yoʻnalishlari” hamda Ilmiy va innovatsion hamkorlik yangi iqtisodiyotni rivojlantirishning asosi» shoʻbalarida oʻz maʼruzalari bilan ishtirok etdilar.

Ikki mamlakat OTM rahbarlari chiqishida Oʻzbekiston oliy taʼlim tizimining jahon taʼlim makoniga integratsiyalashuvi, Tojikiston universitetlari bilan hamkorlik strategiyasi, qoʻshma loyihalari yaratilishi va ularning muvaffaqiyatlari mavzularida aloqalarning muhim jihatlari qayd etildi.

Muzokaralar natijasida 28 ta Anglashuv memorandumi, Bitim va “Yoʻl xaritalari” imzolandi. Anjuman doirasida U-2-U (Universitet-Universitet) formatida rektorlar uchrashuvi oʻtkazildi, anglashuv memorandumi, bitim hamda “Yoʻl xarita”lari imzolandi.

Shuningdek, Oliy taʼlim, fan va innovatsiyalar vaziri vaziri I. Abdurahmonov Tojikiston Respublikasi Taʼlim va fan vaziri R.Saidzoda ikki davlat taʼlim muassasalari oʻrtasida qoʻshma taʼlim dasturlarini koʻpaytirish, oʻzbek-tojik qoʻshma universitetini tashkil etish masalasini oʻrganib chiqish, shuningdek, Ikkinchi rektorlar forumini Toshkentda tashkil qilishga kelishdilar.

Tojikiston milliy universiteti rektori Q. Xushvaqtzoda bilan boʻlib oʻtgan uchrashuv davomida, mazkur universitet hamda Mirzo Ulugʻbek nomidagi Oʻzbekiston milliy universiteti bilan qoʻshma taʼlim dasturini tashkil etish hamda Tojikiston fuqarolari uchun Oʻzbekiston oliy taʼlim muassasalarida taʼlim olish uchun grantlar tashkil etish, shuningdek, mazkur universitet xodimlari uchun qisqa muddatli oʻquv kurslarini tashkil etish masalasi muhokama etildi.

Tojikiston milliy universitetida Tojikiston OTMlarida tahsil olayotgan 300 nafardan ortiq oʻzbekistonlik yoshlar ishtirokida ochiq muloqot tashkil etildi.