Bugun, 27-oktyabr kuni Oʻzbekiston Respublikasi Oliy Majlisi Senati Raisi Tanzila Narbayeva Qirgʻiziston Respublikasi Jogorku Keneshi Toragʻasi Nurlanbek Shakiyev bilan Samarqandda Mustaqil Davlatlar Hamdoʻstligi ishtirokchi davlatlari Parlamentlararo assambleyasi (MDH PA) maydonida uchrashdi.

Uchrashuvda ikki tomonlama hamkorlik va parlamentlararo hamkorlikning dolzarb masalalari muhokama qilindi.

T.Narbayeva parlamentlararo hamkorlik, qonun ijodkorligining turli jihatlari boʻyicha oʻzaro tajriba almashishni yoʻlga qoʻyish muhimligini alohida taʼkidladi. Jumladan, parlament aʼzolari koʻmagida, birinchi navbatda, ikki tomonlama kelishuvlarning huquqiy asoslarini taʼminlab, ularni yuqori darajada amalga oshirish doirasida yangi sezilarli natijalarga erishish zarurdir. Bu yoʻnalishda Oliy Majlis va Jogorku Kenesh oʻrtasidagi hamkorlik boʻyicha parlamentlararo komissiya muhim rol oʻynashi kerak.

Oʻz navbatida, N.Shakiyev Oʻzbekiston Respublikasi bilan doʻstona va yaxshi qoʻshnichilik munosabatlarini rivojlantirish Qirgʻiziston Respublikasi tashqi siyosatining ustuvor yoʻnalishlaridan biri ekanini, oʻrnatilgan yaqin, ishonchli aloqalar, toʻgʻridan-toʻgʻri va muntazam muloqotlar sharofati bilan barcha darajalarda soʻnggi yillarda ikki tomonlama munosabatlarni rivojlantirishda sezilarli ijobiy dinamika kuzatilayotganligini taʼkidladi.

Uchrashuvda tomonlar chegaradosh hududlar deputatlari oʻrtasidagi toʻgʻridan-toʻgʻri aloqalarni faollashtirish, ikki tomonlama savdo hajmini yanada oshirish, shuningdek, madaniyat, taʼlim, fan va sanʼat sohalarida ikki tomonlama aloqalarni mustahkamlash muhimligini muhokama qildi.

Uchrashuv yakunida Parlamentlararo komissiyaning uchinchi majlisini 2023-yilning boshida Oʻzbekiston hududlaridan birida oʻtkazish boʻyicha kelishuvga erishildi.