Oʻzbekiston Respublikasi Oliy Majlisining inson huquqlari boʻyicha vakili (Ombudsman)ga fuqaro Sh.L. qariyalar uyiga joylashtirish masalasida murojaat qildi.

Murojaatchining soʻzlariga koʻra, boshpanasi yoʻqligi sababli u 2006-yildan beri koʻchada yashaydi va shu sababli sogʻligʻi ancha yomonlashgan.

Ombudsman xodimlari tomonidan ishchi guruh tashkil etilib, murojaat joyiga chiqib oʻrganildi. Fuqaro Sh.L. “Oʻzbekiston temir yoʻllari” poliklinikasi hovlisidagi oʻrindiqlardan topildi. U bilan suhbatlashib qayerda tunashi va ovqatlanish sharoitlari oʻrganildi. Aniqlanishicha, avvallari shahar tashqarisidagi uylardan birida qoʻriqchi boʻlib ishlagan, lekin uy egasi turar-joyini sotgani sababli fuqaro Sh.L. koʻchada qolgan. Murojaatchining qarindoshlari va bolalari yoʻq, oʻzi esa keksayib qolgan.

Maʼlumki, soʻnggi yillarda mamlakatimizda ijtimoiy himoyaga muhtoj aholi qatlamlarini davlat tomonidan qoʻllab-quvvatlashning samarali tizimini shakllantirish boʻyicha keng koʻlamli ishlar amalga oshirildi. Qabul qilingan hujjatlarga asoslanib, Ombudsman Oʻzbekiston Respublikasi Tibbiy-ijtimoiy xizmatlarni rivojlantirish agentligiga murojaat qilib, fuqaro Sh.L.ni qariyalar uyiga joylashtirishda amaliy yordam soʻraldi.

Natijada murojaatchi Toshkent viloyati Ohangaron tumanidagi “Saxovat” internat uyiga joylashtirildi.

2022-yil 27-dekabr kuni Oliy Majlisning Inson huquqlari boʻyicha vakilining Toshkent viloyatidagi mintaqaviy vakili internat uyiga borib, fuqaro Sh.L. bilan suhbatlashdi.