AQSH federal sudi Donald Tramp maʼmuriyatining Garvard universitetini xalqaro talabalarni qabul qilish imkoniyatidan mahrum etish boʻyicha chiqargan qarorini vaqtinchalik blokladi. Bu haqda DW nashri xabar berdi.

Juma kuni chiqarilgan bu qaror Massachusets okrug sudi sudyasi Ellison Berrouz tomonidan eʼlon qilindi. Qayd etish kerakki, sudya Berrouz sobiq prezident Barak Obama tomonidan tayinlangan amaldagi federal sudyalardan biridir.

Mazkur sud qarori Tramp maʼmuriyati tomonidan Garvard universitetining xalqaro talabalar va almashinuvchilar dasturi — “Student and Exchange Visitor Program” (SEVP) boʻyicha faoliyat yuritish sertifikatini bekor qilish harakatiga toʻsiq boʻlib turadi.

Sertifikat bekor qilinsa, universitet xalqaro talabalarni qabul qila olmay qolishi mumkin edi. Sudning bu qarori ayni paytda muhokama jarayoni davom etayotgan paytda SEVP faoliyatini saqlab qolishga xizmat qiladi. Shu bilan birga, Oq uy ushbu qaror ustidan apellyatsiya berish huquqiga ega.

Bundan bir kun avval, AQSH Ichki xavfsizlik vaziri Kristi Noyem Garvard universitetini qator jiddiy ayblovlar bilan tanqid qilgan edi. U universitetni “zoʻravonlik va antisemitizmni ragʻbatlantirish”da, shuningdek, “Xitoy Kommunistik partiyasi bilan muvofiqlikda ishlash”da ayblab, SEVP sertifikatini bekor qilishni buyurgan edi. Bu ayblovlar xalqaro hamjamiyat va akademik doiralar tomonidan tanqid ostiga olindi.

Javob tariqasida, 23-may kuni Garvard universiteti Massachusets federal sudiga rasmiy daʼvo arizasi bilan murojaat qildi. Daʼvo arizasida universitet Tramp maʼmuriyatining chet ellik talabalarni oʻqitishni toʻxtatishga oid qarorini noqonuniy va konstitutsiyaga zid deya baholadi. Universitet bu qaror nafaqat akademik erkinlikka, balki minglab xalqaro talabalar taqdiriga ham bevosita tahdid solishini taʼkidlab oʻtdi.

Mazkur sud qarori hozircha vaqtinchalik boʻlsa-da, u Garvard universitetining chet ellik talabalarni oʻqitishda davom etishiga imkon yaratadi. Bu holat nafaqat AQSHdagi oliy taʼlim muassasalari, balki global miqyosda xalqaro talaba almashinuvi va taʼlim erkinligi masalalariga ham bevosita taʼsir koʻrsatishi mumkin.